806

On yedinci madde: Cemiyet heyetinin suret-i devamlarını mübeyyin olmak üzere reis nezdinde bir defter bulunacak ve cemiyetin vakt-i küşadından yarım saat müruruna kadar gelen azanın esamisi sırasıyla işbu deftere kayd edilerek nısf saat hitam bulduğunu müteakib yazılan esaminin zirine reis tarafından bir hat keşidesiyle defter kapatılıp mevadd-ı âtiyede beyan olunduğu vechile müzakerata bed’ olunacaktır.

On sekizinci madde: Azay-ı cemiyetten biri mazeret-i vücudiye veyahut bir memuriyet-i resmiyesinden hasıl olmuş mevaniden maada esbab ile biribirini müteakib üç defa bulunmadığı halde kendisine müstafi nazarıyla bakılıp yerine derhal diğeri tayin olunacaktır.

On dokuzuncu madde: Cemiyetin küşadını müteakib içtima-ı sabıkın müzakere mazbatası kıraat ve zabtda noksan ve galat görüldüğünde itmam ve tashih olunduktan sonra ziri reis ve aza tarafından tasdik ve imza edilecek ve evvela nezaretten havaleli kâğıtlar ve cemiyete merbut komisyonlar olduğu halde anlardan gelen takrirler ve badehu sair işler müzakere olunacaktır.

Yirminci madde: Reis cemiyet mesalihi tarihli tertibiyle mevki-i müzakereye koyacak ve fakat bir maddenin takdim-i müzakeresi azadan biri tarafından ihtar olunup bu suret azay-ı saire tarafından dahi kabul ve tasdik kılındığı halde ol maddenin tarihi muahharan dahi olsa en evvel müzakere edilecektir.

Yirmi birinci madde: Reisin gıyabında cemiyetde mevcud olan aza içlerinden birini riyasete intihab edeceklerdir.

Yirmi ikinci madde: Cemiyetin müzakeratında ekseriyet-i araya itibar edilecek ve arada müsavat vukuunda reisin re’yi munzam olan taraf müreccah olacaktır.

Yirmi üçüncü madde: Beşinci madde mucibince Mekteb-i Fünun-ı Tıbbiye talebesinden cemiyete dahil olanlar müzakerat-ı vakıada alel-itlak beyan-ı re’ye memur olmayıp yalnız sual olunan şeylere beyan-ı mütalaat edebileceklerdir.

\* Yirmi \*