801

Sekizinci madde: Memleket tabibi hanelerine celb eden kimseler fukara ve acezeden oldukları halde mahalli idare-i belediyesi tarafından yapılıp umur-ı tıbbiye-i mülkiye tarafından tasdik kılınmış tarife mucibince tabibe lazım gelen ücreti vereceklerdir.

Dokuzuncu madde: Memleketin muvazzaf tabibinin bir özr-i şer’îsi olmaksızın mevadd-ı sabıkada mezkûr vazaife riayet etmemesi azle badi olur.

Onuncu madde: Memleket tabibi daire-i memuriyeti dahilinde bir maraz-ı müstevli zuhuru akabinde hükümet-i mahalliyeye bil-müracaa ol babda iktiza eden mahallere telgrafla ve telgraf olmayan yerlere vesait-i mümkine-i acile ile malumat ita ve maraz-ı müstevlinin tabiatına ve kavaid-i tıbbiyeye göre lazım gelen tedabiri hükümet-i mahalliyenin reyiyle ifa etmeye mecbur olduğu gibi memuriyeti hududundan hariç olan bir mahalde emraz-ı müstevliye vukuunda veyahut emraz-ı belediyenin esna-yı devamında hükümet-i mahalliyenin emri üzerine ol mahalle gidip o misillü emrazın esbab-ı zuhuru ve men’i hakkında icrasına lüzum gördüğü tedabiri derhal hükümet-i mahalliyeye bildirecek ve Nezaret-i Tıbbiye-i Mülkiye’ye dahi malumat verecektir.

On birinci madde: Emraz-ı müstevliye zuhur ve emraz-ı belediye devam eden mahallere memuren gidecek memleket tabibine memuriyetinin ehemmiyet ve müddetine göre itası lazım gelen masarif memuriyetini emreden hükümet-i mahalliyenin idare-i belediyesi tahsisat-ı fevkaladesinden tesviye olunacaktır.

On ikinci madde: Memleket tabibi icra-yı tababet edeceği daire dahilinde bulunan mevaki ve mahallatın evvel be-evvel topoğrafyasını öğrenmekle ve mevaki-i mezkûrede emraz-ı belediye olduğu halde ol emrazın neş’et ve devamı esbabını ve izalesiçün lazım gelen vesait-i sıhhiyeyi keşf ve tayin eylemekle memurdur.

On üçüncü madde: Memleket tabibi mahal-i memuriyetine vusulünden nihayet dokuz aya kadar madde-i sabıkada münderiç mesaile dair olan keşfiyat ve mütalaatı hakkında