813

Üçüncü Mâdde: Etibbâ-yı mülkiye livâ ve vilâyet ve teftîş sınıfı ünvânlarıyla üç sınıf i‘tibâr olunup livâ tabîbleri bin guruş ma‘âş ile rütbe-i sâlise ve vilâyet etibbâsı bin beş yüz guruş ma‘âş ile rütbe-i sâniye sınıf-ı sânîsine ve müfettişleri iki bin guruş ma‘âş ile rütbe-i sâniye sınıf-ı evvel mütemâyizine müstehak olacaklardır.

Dördüncü Mâdde: Tıbbiye-i Mülkiye’de ikmâl-i tahsîl ile icâzetnâme ahz edenler ibtidâ livâ etibbâsı sınıfına mahsûs olan mükâfâta nâil olacak ve bunların terakkî-i sınıfı livâ tabâbeti sınıfında üç sene hizmete ve andan sonra vilâyet etibbâsı sınıfında hâl vukû‘uyla berâber beynel-akrân kesb-i kıdem ve isbât-ı rüçhân eylemekliğe mütevakkıf bulunacaktır. Vilâyet etibbâsının teftîş sınıfına intikâli dahi kezâlik üç sene müddet-i hizmete ve andan sonra beynel-akrân kesb-i kıdem ve isbât-ı rüçhân eylemekliğe menûttur ve havâlî-i Hicâziye ve sâir mahâll-i ba‘îdeye gönderilecek etibbânın sınıflarına mahsûs ma‘âşlarına beşer yüz guruş zamm olunacaktır.

Beşinci Mâdde: Mekteb-i Tıbbiye-i Mülkiye’de fenn-i ispençiyârî tahsîl edip eczâcılıkla çıkanlar dahi livâ ve vilâyet eczâcısı ünvânıyla iki sınıf i‘tibâr olunup livâ eczâcıları beş yüz guruş ma‘âş ile rütbe-i sâlise ve vilâyet eczâcıları yedi yüz elli guruş ma‘âş ile rütbe-i sâniye sınıf-ı sânîsine müstehak olacaklardır.

Altıncı Mâdde: Etibbâ ve eczâcıların ma‘âşları me’mûriyetlerine mahsûs olacaktır.

Fî 16 Cemâziyelâhir sene 1287