825

( Karantina Nizamnamesi )

Dersaadet’de mukim düvel-i mütehabbe süferası taraflarından nasb ve tayin kılınan memurlar ile meclis-i tahaffuz azası ve memurîn-i saire memalik-i mahrûseye bahren tevârüd iden sefâin ve yolcu ve emtia ve eşya haklarında karantina usulünün ticaret-i bahriyeye halel getirmeyerek bir suret-i hasene ile tesis ve icrası zımnında müzakereye mübaşeret etmeleriyle taraflarından gereği gibi söyleşildikden sonra ittifak-ı ârâ ile âtiü’z-zikr nizâmât-ı nâfianın icrasına karar verilmiştir.

( Patente-i Sıhhiye )

Birinci madde: Âsitâne-i Aliyye ve memalik-i mahrûsenin diğer limanlarına tevârüd iden sefâin kapudanlarının beherinin yedinde bir patentesi olub patente-i mezkûru tahaffuzhâne memuruna ibraz edecekdir.

İkinci madde: Mârü’z-zikr tezkere üç nevi olub birisi temiz ve diğeri meşkûk ve biri dahi bulaşık itibar olunur.

( Temiz Tezkere )

Birinci bend: Bir mahalde hastalık vukuundan otuz gün sonra verilmiş olan tezkere temiz itibar olunub işbu tezkereyi hâmil olan sefine kendü müllahları ve hamûle ve yolcularıyla kabul olunacaktır.

( Meşkûk Tezkere )

İkinci bend: Hastalık vukuundan on beş gün sonra verilmiş olan tezkere meşkûk itibar olunarak tezkere-i mezbûreyi hâmil olan her bir sefine eğerçi hamûleli ise on beş gün ve tehî olduğu halde on gün karantina müddetini çıkarmağa mecbur olacakdır.

( Bulaşık Tezkere )

Üçüncü bend: Hastalık vukuundan on beş gün zarfında verilmiş olan tezkere bulaşık itibar olunacağından tezkere-i mezkûreyi hâmil olan her bir sefine eğerçi hamûleli ise yirmi gün ve tehî bulunduğu takdirce on beş gün karantina çıkaracakdır.

104