835

Geldigi mahallin temiz oldugunu isbat etmez ise bulaşık yolcu sınıfından ta‘dâd oluna

( Yirmi birinci madde vapur sefâini )
Beher hafta âmed-şüd eden vapur sefâini masârif-i kesîreden halâs olmak içün sefâin-i merkûmenin geldikleri mahal bulaşık yâhud meşkûk oldığı müddetçe derûn-ı sefâinde gardiyanlarını alıkomaları câiz ola

( Yirmi ikinci madde hatâ ve hilâf hareketde bulunanlar )
Karantina maddesinden vukû‘a gelen bi’l-cümle hatâ ve hilâf hareket ba‘de’t-tahkîk ve’l-isbât bu makûle hilâf hareketde bulunan eşhâs te’dîb olunmak üzere müte‘allik oldığı zâbıtânı tarafına teslîm oluna

( Yirmi üçüncü madde karantina me’mûru tarafından hey’et-i sıhhiyesi aklaşılmamış sefâin )
Devlet-i ‘Aliyye’nin tahaffuzhâne bulunan limanlarına yâhud mahâll-i sâiresine tevârüd eden sefâin karantina me’mûru tarafından söylenmedikçe sefâin-i mezkûreye takarrub herkese memnû‘ ola eğerçi bu memnû‘iyete adem-i vukûf cihetiyle sefâin-i mezkûreye bir kimesne takarrub ister ise kapudanlar bu makûle hilâf hareketin men‘ine sa‘y ve dikkat edeler ve bu maddede hilâf hareketde bulunan kimesnenin rütbe ve hey’etine bakılmayarak karantina me’murları tarafından tutulup te’dîb olunmak üzere bulaşık bulunduğu halde karantinasını çıkardıktan sonra müte‘allik oldığı zâbıtânı tarafına teslîm oluna

( Yirmi dördüncü madde cedîd patente i‘tâsı )
Birinci bend. Bir sefîne müddet-i karantinasını bir mahalde tekmîl edüp pratikasını aldığı halde veyâhud meşkûk ve bulaşık hey’etinde bulunmayarak hamûle alup veyâhud ihrâc etdiği sûretde karantina me’murları tarafından cedîd patente i‘tâ oluna