836

İkinci bend, fakat âmed-şüd eden sefâin hakkında hâmil oldukları patentalara karantina memuru tarafından ancak temhîr ve imzâ oluna.

( Yirmi beşinci madde Karantina rusûmâtı )

Dersaâdet’de tarife mûcibince karantina rusûmâtının ahz ve tahsîli işbu nizâmnâmenin sefâret memurlariyle sâir a’zâ-yı meclis tarafından imzâ ve düstûrü'l-amel tutulduğu günde şürû’ ve memâlik-i mahrûsenin bilcümle limanlarında her bir mahallin karantinalarına vusûlü gününden bed’ oluna.

( Yirmi altıncı madde Beklik sefâin hakkında )

Birinci bend, meşkûk yâhûd bulaşık limanlardan tevârüd eden gerek Devlet-i Aliyye ve gerek düvel-i ecnebiyenin sefâin-i harbiyeleri tehi tüccar sefineleri meselâ usûl-i karantina icrâsına mecbûr olurlar ve derûnuna iki nefer gardiyan alıp mezkûr gardiyanların ta’rîf eyledikleri usûl-i tathîriyenin icrâsına ibtidâr edeler ve gardiyanın birisi filika bir hizmete gitdikçe dâimâ filika derûnunda buluna.

İkinci bend, bu makûle sefâinin karantinaları gardiyanları ahz eyledikleri günden i’tibâriyle bulaşık olanların on iki gün ve meşkûk olanların yedi gün olacakdır.

Üçüncü bend, bu misillü ba’zı sefâinin patenta-i sıhhiyeleri olmadığından kumandanları zîr-i idârelerinde bulunan sefinelerin mahall-i hareket ve hey’et-i sıhhiyesini ve esnây-ı râhda kangı mahalle uğradıklarını ve kangı sefâin ve kayıklara ihtilât etdiklerini iki boğazların birinden mürûrlarında doğruca i’lân edecekdir ve Dersaâdet’e yâhûd memâlik-i mahrûsenin dîger limanlarına vusûllerinde tevârüd eden sefâinin kapudanları mahall-i mezkûrun parlatoriosuna gelip karantina memuru tarafından ibrâz olunan suâl evrâkına cevâb yazıp imzâ edeler ve gerçi temiz bulunur iseler memur-ı mezkûr tarafından kendilere pratika verile eğer bi’l-akis temiz olmazlar ise karantina memurları îcâb eden usûl-i tahaffuziyeyi kendilerine iş’âr ve beyân ile icrâsına sa’y edeler.

Âsitâne