840

Cenaze nisa taifesi olduğu halde emniyete şayan bir hatun bulunup cenaze-i mezkûreyi muayene edeceği.

Beşinci Madde: Gerek bahri ve gerek berri kanunnamelerinde münderic olan usulleri ayrı seçi etmeyerek herkesin hakkında bilâ-fark icra olunmasına karantina memuru ziyadesiyle dikkat edeceği ve bilakis bu makule mugayir nizam hareketi binnefs memur-ı mezkûr eder ise veyahut böyle hareketin vuku bulmasına muavenet eyler ise veyahut vuku bulduğundan ifade etmez ise o misillü memur hizmetten tard ve te'dib olunacağı.

Altıncı Madde: Karantina memuru Nezaret-i Tahaffuz-ı Âsitane'den ruhsat tahsil etmeksizin mahal-i memuriyetinden gaib olmayacağı ve gaib olduğu halde memurun hizmetini karantina tabibi vekâleten rü'yet edeceği.

Yedinci Madde: Karantina memuru zir-i idaresinde olan mahallerin birinde veyahut mahal-i sairede veyahut veba hastalığının zuhurundan haberdar olduğunda bu hastalığın kangı gün zuhur ettiğini ve bu havadisi kimden ve kangı gün duyduğunu der-akab Nezaret-i Âsitane'ye inha edeceği ve tabib ile bil-ittifak icab eden usul-i tahaffuziyeyi icra edeceği.

Sekizinci Madde: Karantina memuru her on beş gün zir-i idaresinde bulunan mahallerin heyet-i sıhhiyesini şamil Nezaret-i Tahaffuziye-i Âsitane'ye bir takrir göndereceği ve Huda-yı Müteal hazretleri hıfz buyursun ilel-i sariye ve mevt-i âmme zuhur eder ise der-akab Nezaret-i Tahaffuziye-i Âsitane'ye bil-etraf ilan edeceği.

Dokuzuncu Madde: Karantina memuru azl olunduğu veyahut ahar bir mahalle tayin olunduğu halde yanında bulunan evrakın cemiisini resmen kendü yerine tayin olunan memura teslim edeceği.

Onuncu Madde: Karantina memuru ve tabibi Nezaret-i Tahaffuziye-i Âsitane tarafından kendülere gönderilen emirleri ve havadisi birbirlerine bildirerek ikisi dahi bu emirlerin icra olunmasına sa'y ve gayret edecekleri.

On Birinci Madde: Karantina memuru ve tabibi zir-i idarelerinde bulunan mahallere hem-civar olan kazalar ve haylice baid olup fakat münasebeti çok olan memleketlerin karantina memurlariyle mektuplaşacakları.

On İkinci