863

Âlât-ı anbâriyyete vaz‘ olunması ve tütsü usûlü her def‘asında on iki sâ‘at
olarak müddet-i karantinada altı def‘a icrâ olunacağı.
Yedinci bend: Tâifeler tabîb beher gün dikkat idüp hasta vukû‘u takdîrinde
illeti tebyîn idinceye dek eşyâsı ile birlikde sefîneden hâric bir mahalle vaz‘
itdirüp mezkûr hasta illet-i mahûfeye dûçâr oldığı sûretde vebâlı
hastahânesine nakl itdireceği.
Sekizinci bend: Derûn-ı sefînede yeniden vebâ zuhûr eyledikde sefînenin karantinası
ve tathîriyenin her usûlü tecdîd olunacağı.
Dokuzuncu bend: Bulaşık sefînenin müddet-i karantinası yirmi bir gün olup ancak
sefîne-i mezbûrenin altı ve ortaları su ile temizlenüp ve kireç ile sıvanup
ve yelkenler ve tâifelerin eşyâsı üçüncü bendde beyân olundığı üzere suya vaz‘
olunarak kurutulmağa bed' olundığı günden i‘tibâr olunacağı.

On dördüncü mâdde: Vebâlı hastaların karantinasına etibbâ dikkat ve nezâret eyleyerek
tekmîlen eyü oldığı ve yâresinin kapandığı haber virdigi günden i‘tibâr
olunarak ol vakit usûl-i ispoliyo icrâ olunarak ispoliyo itdikden sonra yirmi
bir gün karantina itdirilerek pratika virilmesi.
On beşinci mâdde: Vebâdan vefât iden kimesneler tahaffuzhâne mezârlığına defn olunup
mezârın derinliği altı kadem olacağı.
On altıncı mâdde: Tahaffuzhânede sıhhat bulan veyâhûd fevt olan vebâlıların
ve yanlarında hizmetde bulunan kimesnelerin bulaşık kabûl iden eşyâsı ihrâk
olunacak ise de mevtâların vârislerine ve hizmetcilerin kendisine bedeli virilmek
üzere bir deftere kayd olunarak tahmîn itdirilmesi.
On yedinci mâdde: İşbu vebâlı olan kimesneler ile ihtilât idenlere ispoliyo itmeğe
ruhsat var ise de eşyâları otuz gün karantina olunup ber-mûceb-i ta‘lîmât-ı
sıhhiye tathîr olundukdan sonra sâhiblerine i‘tâ olunması ve bu usûl üzere on beş
gün karantina idecekleri.
On sekizinci mâdde: Yolcıların üzerlerinde mektûb ve emânet ve evrâk-ı sâire
ve bu misillü tathîr olunmamış bir şey saklamalarını evvelce karantina me'mûrları