864

Taraflarından haber verilerek gerek sefînede ve gerek anbarında ve sefîne derûnunda oda ve fıçı ve dolab ve sandık ve el-hâsıl gizli bir mahalde kasden olsun veyâhud dikkatsizlikden olsun bulaşık kabûl eder eşyâ saklanmış olub bulunur ise karantinaları yeniden başlanılacağı

On dokuzuncu madde: Bulaşık olan sefîneyi gerek sevâhil ve gerek temiz sefîneler ile ihtilât etmemesi içün ayrıca bir mahalle temirlendirilmesi ve pranka alınıncaya kadar mahal-i mezbûrda bırakılması ve derûn-ı sefîneye iki nefer gardiyan vaz‘ından mâadâ sandal ile zahîre ve sâir levâzımât nakliçün iskeleye ve karaya yanaşdıkda ihtilât etmemelerine dikkat etmek üzere bir nefer gardiyanın dahi ta‘yîni îcâb edeceği ve bu gardiyanlar sefîneye taşradan bir kimse takarrüb etdirdiklerinde hizmetlerinden tard olunarak habs olunacakları kendilerine ifâde olunması

Yirminci madde: Sandallar gurûb-ı şemse yakîn gemilere alınıb tulû‘-ı şemsden evvel denize indirilmeyeceği

Yirmi birinci madde: Fakîr ve bî-nevâ olanlardan mâadâ ve ba‘den hasta olub iyvâ olunanlar karantina masârifini tekmîlen i‘tâ etmeleri ve sefîne kapudanı dahi sefînesinin tathîriçün karantina masârifini kezâlik te’diye etmesi

Yirmi ikinci madde: Karantina tabîbinin ruhsatı olmadıkça yolcu ve tâifelere hîç bir mu‘âlece verilmeyeceği

Yirmi üçüncü madde: Yolcular veyâhud tâifelerde hasta zuhûr eyledikde ta‘yîn olunan gardiyanlar müdîr veyâhud tabîbe ifâde etmezlerse te’dîb olunacakları müekkeden tenbîh olunacağı

Yirmi dördüncü madde: Tahaffuzhânede vebâlı hasta bulunduğu vakitde mahal-i mezbûr me’mûrları mezkûr hastaların iyileşmesine ve espolyo olunmasına ve öldükleri mahalleriñ tathîr kılınmasına kadar karantinada bulunacakları

Yirmi beşinci madde: Yolcular veyâhud gardiyanlar işbu vebâlılar ile ihtilât etdikden soñra on gün mürûr edinceye kadar dâirelerinden taşra çıkmak memnû‘ idüğü

Yirmi