88

Yapılacak ve ta‘mîr olunacak cebhâne mahallerine bi-hıfzı’llâhi te‘âlâ seyyâle-i berkiyenin
mazarratını def‘ içün isti‘mâl olunan siper-i berkiye vaz‘ olunmak üzere hîn-i
lüzûmunda Ebniye Meclisi tarafından Mühimmat-ı Harbiye Nezâreti cânibine ihbâr olunacak
ve kezâlik müceddeden yapılan veyâhud ta‘mîr olunan cevâmi‘-i selâtîn menârelerine
ve büyük kışla kulelerine dahi ber-vech-i meşrûh siper-i berkiye vaz‘ olunmak içün
Ebniye Meclisi tarafından mensûb oldukları mahallere ihtâr kılınacakdır
Fî 11 N sene 1273

( Zeyli )

Mâdde-i mahsûsa mesârif-i Hazîne-i Şâhâne’de rü’yet olunan ebniyeden
muhtâc-ı ta‘mîr olan mevâki‘in Dersaâdet’de bin ve taşralarda iki bin guruşa
kadar bilâ-isti’zân vukû‘ bulan mesârifâtı kemâ-kân hazînece kabûl olunması
birinci maddede muharrer ise de yalnız Dersaâdet’de gerek ebniye-i vakfiye’nin ve gerek
sâir ebniye-i mîriyenin beş bin guruşa kadar vukû‘ bulacak ta‘mîrâtı kabl-el-isti’zân
yürütülecekdir ve bu yolda istîzândan evvel teşebbüs olunmuş olan ebniyeler
mesârifâtı hakkında Nezâret tarafından her gûne takayyüdâtın icrâsiyle masrafının
kabûlü içün arz olunacak takrîrlerde tedkîkât-ı vâkı‘anın bu vechile icrâ
kılındığı beyân olunacakdır

Fî gurre-i Receb sene 1274

Varaka