902

( Rum Patrikhanesi umurunun ıslahı zımnında patrikhane )
( mezkûrda müctemi olan komisyonun patrik intihab ve nasbına dair )
( tertib eylediği nizamname-i umuminin tercümesidir )

( Fasl-ı Evvel )
( Suret-i intihab beyanındadır )

Birinci Madde: İstanbul patrikliği mesnedinde hall vukuunda cemaat metropolidan ile meclis-i muhtelit azası birleşerek Dersaadet'de bulunan metropolidlerden evsaf-ı matlubeyi câmi bir zatı kaymakam olmak üzere intihab ederek keyfiyet-i hali ve kaymakam olacak zatı ba-mazbata Bab-ı Ali'ye arz edip müteallik buyurulacak irade-i seniye-i mülûkane mucibince kaymakamın memuriyetine patrik intihabının ber-mucib-i nizam icrasını mutazammın buyruldu gönderilecektir.

İkinci Madde: Madde-i sabıkanın ahkamı icra olunduktan sonra İstanbul patriğine tâbi bulunan metropolidana umumen mektublar irsal olunup mefhumunda piskopos rütbesini haiz bulunan umum ruhbanından mahkeme-i vicdaniyelerinde her hangisi zîrde tasrih kılınan evsaf ile muttasıf ve bu cihetle patriklik kürsüsüne kuuda münasib görürler ise anın ismini bir varakaya terkim ve işbu varakayı memhur zarf içinde olarak bir kıta mektuba leffen nihayet kırk bir gün zarfında Dersaadet'e isal etmeleri kendilere iş'ar olunacaktır. Bundan başka zîrde mestur yirmi sekiz metropolidin dairesinde olan ahalinin dahi meclis intihabda birer vekilleri bulunmak için avamdan münasib kimesnelerin yevm-i muayye'nde Dersaadet'de bulunmaları mezkûr yirmi sekiz metropolidlik ahalisine mahsusan tahrir ve iş'ar kılınacaktır.

Üçüncü Madde: Kezalik cemaat metropolidan azasıyla metropolidan-ı saireden ittifakan Dersaadet'de bulunanların her biri patrikliğe müstehak bildikleri piskoposun ismini yevm-i intihabdan beş gün mukaddem bir varakaya tahrir ve temhir birle taşralardaki metropolidler tarafından vürud etmiş olacak rey varakaları torbasına vaz edeceklerdir.

Dördüncü Madde: Patrik intihabı içün tayin olunan kırk bir gün müddetin inkızasından