927

Tarafından tasdik kılınacakdır ve meclis-i mezkûrda tertib ve tanzim kılınacak her bir kâğıd varaka-i sahiha üzerine yazılacak ve meclisden ihrac olunacak bi'l-cümle kâğıdlar akdemce deftere kayd olunacakdır.

On Birinci Madde: İki Hristiyan beyninde hukuk-ı irsiye gibi deavî-i mahsusa sahib-i dava olanların istidaları üzere Patrikhaneye havale olundukda meclis-i mezkûrda rüyet ve tesviye olunacakdır.

On İkinci Madde: Her Ortodoks İseviyenin kavanin ve nizamat-ı devlet-i aliyeye ve bu kere Hristiyan terekeleri hakkında verilen karar ve nizamı havi tasdîr olunan evamir-i umumiye-i resmiyede münderic kaideye tevfikan tertib eylemiş olduğu vasiyetnamesi devlet-i aliyenin bi'l-cümle hükûmat-ı mahalliyesi indinde cari ve muteber tutulduğundan o makule vasiyetnamenin havi olduğu ahkam ve şurûtun tenfiz ve icrasına meclis-i muhtelit-i mezkûr tarafından sarf-ı himmet ve dikkat olunacakdır.

On Üçüncü Madde: Millet mektebi ve hastahane ve sair hayrata müteallik ebniyelerin ve Dersaadet’de vaki kilisa ve manastırların varidat ve masarifat ve vasiyetname ve vakfiyelere dair terahhum akçesiyle cehaza müteallik hususata dair piskoposlar tarafından ita olunacak bi'l-cümle senedat meclis-i mezkûrda muteber tutulacakdır.

On Dördüncü Madde: Üçüncü maddede tayin olunan mevadd-ı muhakemeye şurû etmezden evvel esna-yı davada zuhur edecek masarif için müddei olanlar irae-i kefalet etmeğe mecbur olacaklardır.

On Beşinci Madde: Memalik-i Mahruse-i Şahanede vaki Ortodoks mezhebinde bulunan İsevilere aid ve mahsus bi'l-cümle ziyaretgâhların hüsn-i tanzimleriyle bunlardan hasıl olan mebaliğin mevcud olan berat ve vasiyet ve imtiyazat ve teberrük-nameleri ahkamı mealine tevfikan suret-i layıka üzere sarf olunması hususlarına İstanbul Patriği tarafından ve iktizasına göre mezkûr ziyaretgâhların zir-i hükmünde bulundukları rüesa-yı ruhaniyesinin re’y ve ittifakı ile bezl-i himmet ve gayret kılınması tedabirine dikkat eylemeleri meclis-i mezkûr azasının vacibe-i memuriyetleridir.