946

Otuz üçüncü madde: Dersaadet kiliselerinin va‘ızlarıyla baş papasları Meclis-i Ruhaninin kararı üzerine Patrik tarafından tayin olunurlar.

Otuz dördüncü madde: Meclis-i Ruhanide her gûne intihab hususi re’y-i hafi ile icra olunur.

Otuz beşinci madde: Ehl-i kilisanın hidemat-ı mezhebiyelerinin meccanen ifa olunabilmesi içün ahval-i hazırelerinin ıslahı ile ahval-i müstakbelelerinin teminine dair Meclis-i Ruhani tarafından bir kıt‘a nizamname tanzim kılınacakdır.

( Meclis-i Cismaniye Dairdir )

Otuz altıncı madde: Meclis-i Cismani avamdan olarak mesalih-i milliye ve nizamat-ı Devlet-i Aliyye’ye vakıf yirmi zevattan mürekkebdir.

Otuz yedinci madde: Meclis-i Cismaninin azası re’y-i hafi ve ekseriyet-i mutlaka-i ara ile Millet Meclis-i Umumisinde bi’l-intihab mazbatası Patrik tarafından Bab-ı Ali’ye takdim olunarak ba-irade-i seniyye nasb ve tayin olunurlar.

Otuz sekizinci madde: Her iki senede bir kere aza-yı merkumenin cümlesi şehr-i Nisan’ın gayetinde dağılıp şehr-i Mayıs ibtidasında tecdid olunurlar. Azay-ı merkume iki sene sonra tekrar intihab olunabilirler ve infisal etdiği ilk iki senede meclis-i mezkur azalığına intihab olunmayıp ama sair gûne hizmetde istihdam olunabilirler.

Otuz dokuzuncu madde: Meclis-i mezkur azasından biri tahriren bir sebeb-i kafi beyan etmeksizin biribirisini müteakiben üç kere meclise gelmediği halde sebebi sual olunmak üzere meclis-i mezkur kalemi zabiti tarafından mektub yazılıp cevab alınmadığı takdirde yeniden mektub tahririyle meclis-i ayende hazır bulunmaz ise kendisine istifa etmiş gibi nazar olunacağı bildirilip yine gelmediği takdirde istifa etmiş addolunur.

Kırkıncı madde: Meclis-i Cismani azasından istifa vukuuna veyahud sair bir sebebe mebni mefkud olanların adedi üçe baliğ oldukda bunların yerine Meclis-i Umumide aharları aza intihab olunur ve bu intihab vuku buluncaya değin meclis-i mezkurda tekmilen azay-ı meclisin ekseriyeti aranılır.

Kırk