957

Odasında gelemezler ise rey verdikleri kesânın esâmisini bir kıt‘a-i mümzâ mektûb ile irsâl ederler.

Yetmiş üçüncü madde: Rey i‘tâsı hafiyyen icrâ olunmak lâzım geldiğinden rey verenler yazdıkları isimleri âharı görmemek üzere mahfîce tahrîr ederler.

Yetmiş dördüncü madde: Rey i‘tâsı bed’ olunduğu gün tekmîl olunmak iktizâ eylediği cihetle rey vermeğe hak olub da imtinâ‘ edenlerin muahharen da‘vâya kalkışmağa salâhiyeti olamaz.

Yetmiş beşinci madde: Hiç bir kimesne iki kilisa cemâatinde rey i‘tâ edemez.

Yetmiş altıncı madde: İntihâbca birleşdirilmiş olan kilisa cemâatleri ve kazâlar yekdiğeri kurbünde vâki‘ ise iki tarafdan intihâba salâhiyeti olanlar bir yere gelerek i‘tâ-yı rey ederler ve mezkûr cemâat ve kazâlar arasında mesâfe-i ba‘îde olduğu halde her biri ayrıca rey verüb ba‘dehu iki tarafa reyleri birleşdirilür.

Yetmiş yedinci madde: Rey i‘tâsı resîde-i hitâm oldukda ol gün ta‘tîl olunmayarak rey kâğıdlarını şâmil olan sandıkça kilisa cemiyeti muvâcehesinde küşâd olunarak ta‘yîn olunan müfettişler rey kâğıdlarını ta‘dâd ederler. Kâğıdların adedi rey veren eşhâsın adedine tevâfuk etmeyüb de cemiyetce hîle vukûunda iştibâhe düşülecek olur ise ertesi pazar gününden evvel yeniden rey verilmek üzere başka bir gün ta‘yîn olunub intihâba matlûb olan aded kadar vekiller bir def‘ada ikmâl olunamaz ise mikdâr-ı bâkîsi hakkında rey i‘tâsı kezâlik yevm-i âhire ta‘lîk olunur.

Yetmiş sekizinci madde: İntihâb edenlerin biri rey kâğıdlarında aded-i muayyenden ziyâde isim yazmış olur ise ol adedi tecâvüz eden isimler makbûl tutulmaz ve isimler yukarudan aşağıya sıra ile yazılmış olmayan rey kâğıdları dahi mülgâ ve münfesih ‘add olunur.

Yetmiş dokuzuncu madde: Rey verenlerin nısf adedinden ziyâde olarak haklarında...