10

Muhalif-i kaide-i ma'delet ve mugayir-i emr ü ferman-ı hazret-i şehinşah-ı adalet-menkıbet
ef'al ve âsârın vukuunda azay-ı müntehabe ve mevsûkanın Bab-ı Âli'ye müracaatları
dahi memnu olmayacaktır.
Meclis-i icraatın işbu kararnamede münderic vezaifini tesri-i fiiliyat içün
bi't-tecrübe ileride tevsi kılınacaktır.
İşbu meclis balada beyan olunan mevaddan maada icraat ve ıslahat-ı sairenin
müzakeresiyle arza dahi me'zundur.

***

Harcırah Hakkında

Vilayatta müstahdem bi'l-cümle memurînin maaşlarının suret-i tesviyesine ve asakir-i
nizamiye ve bahriye ve redife ile zaptiye harcırahları nizamat-ı mahsusaya
tevfikan tesviye olunacağı cihetle anlardan maada memurîn-i daime ve muvakkateye
verilecek harcırah ve yevmiyenin derecatına ve me'zuniyetle merkez-i memuriyetlerinden
tebaüd edenlerin esas-ı harekatına dair kararnamedir.

Birinci Fasıl

( Memurînin maaşa istihkaklarına dairdir )

Birinci Madde: Dersaadet'den vilayetlere ve vilayetlerce dahil-i vilayet olan mahallere
tayin olunan bi'l-cümle memurînin maaşları tarih-i nasblarından muteber olmayıp merkez-i
memuriyetlerine vusullerinden itibaren tam olarak işleyecektir ve mahal-i memuriyetine
azimet veyahut merkez-i memuriyetine muvasalat etmeksizin vefatı veya infisali
vuku bulan veyahut memuriyeti ahır mahalle tahvil kılınan memurların maaş
ahzına hak ve salahiyeti olmayacaktır.

İkinci Madde: Mevadd-ı mahsusa zımnında maaş tahsisiyle bir mahal(e) tayin
olunmaksızın seyyar sıfatıyla izam olunan memurîn-i muvakkate ve daimenin maaşları
memur oldukları mahalden hareketleri tarihinden itibaren işleyecektir.

Üçüncü Madde: Mevadd-ı mahsusa zımnında Dersaadet'den bir mahalle mikdar-ı muayyen
maaş ile tayin olunan memurîn-i muvakkatenin maaşları memur oldukları mahalle
( vusullerinden )