105

Fasl-ı Sâni

(Şirket-i akdin şerâit-i umumiyesi beyanındadır)

1333 Madde
Şirket-i akdin her kısmı vekâleti mutazammındır. Şöyle ki şeriklerden her biri tasarrufda yani alup satmakda ve âhardan ücretle iş takabbül etmekde diğerinin vekilidir. Binaenaleyh vekâletde akıl ve temyiz şart olduğu gibi alel-umum şirketde dahi şeriklerin âkıl ve mümeyyiz olmaları şartdır.

1334 Madde
Şirket-i mufâvaza kefâleti dahi mutazammındır. Binaenaleyh mufâvızların kefâlete ehliyetleri dahi şartdır.

1335 Madde
Şirket-i inan yalnız vekâleti mutazammın olup kefâleti mutazammın değildir. Binaenaleyh hîn-i akdinde kefâlet zikr olunmadığı suretde şerikler yekdiğerin kefili değildir. Bu cihetle sabiyy-i me’zun dahi akd-i şirket-i inan edebilir. Amma şirket-i inanın hîn-i akdinde kefâlet zikr olunduğu takdirde şerikler yekdiğerin kefili olur.

1336 Madde
Şerikler beyninde ribhin ne vechle taksim olunacağı beyan olunmak şartdır. Mübhem ve meçhul kalırsa şirket fâsid olur.

1337 Madde
Şerikler beyninde taksim olunacak ribhin hisseleri nısf ve sülüs ve rubu‘ gibi cüz-i şayi‘ olmak şartdır. Şeriklerden birine ribhden maktuan şu kadar kuruş verilmek üzere mukavele olunsa şirket bâtıl olur.

Fasl-ı Sâlis

(Şirket-i emvâlin şerâit-i mahsusası beyanındadır)

1338 Madde
Sermayenin nukud kabilinden olması şartdır.

1339 Madde
Râyic olan bakır sikke örfen nukuddan ma‘duddur.

1340 Madde
Meskûk olmayan altun ve gümüş ile muamele beyne’n-nâs örf ve âdet ise bunlar dahi nukud hükmünde olurlar.

8