115

Amma malı itlaf ve bi-gayr-i ivaz temlik hususlarını şerikinin izn-i sarihi olmadıkça yapamaz.
Mesela şerikinin izn-i sarihi olmadıkça mal-ı şirketten kimesneye ikraz ve hibe edemez.

1383 Madde — Şeriklerden biri diğerini mal-ı şirketle ahar diyara gitme yahud veresiye mal satma deyu nehy etmişiken diğeri dinlemeyip de ahar diyara gitse yahud veresiye mal satsa vaki olan zarardan şerikinin hissesini zamin olur.

1384 Madde — Şirket-i ananın muamelelerinde şeriklerden birinin borç ikrar etmesi diğerine sirayet etmez.
Şöyle ki ol deynin ancak kendi akd ve muamelesi ile olduğunu ikrar etmiş ise tamamını kendisinin ifa eylemesi lazım gelir.
Ve eğer şerikiyle birlikte icra eylediği muameleden dolayı bir borç olduğunu ikrar etmiş ise nısfını eda eylemesi lazım olur.
Ve eğer ancak şerikinin icra eylediği bir muameleden dolayı borç olduğunu ikrar etmiş ise bir şey lazım gelmez.

Mebhas-ı Sani

( Şirket-i amale dair olan mesail beyanındadır )

1385 Madde — Şirket-i amal iş takabbül etmek üzere akd-i şirketten ibarettir.
Şöyle ki ecir-i müşterekler müstecirin tarafından taleb ve teklif olunan amelin ifasını takabbül yani taahhüd ve iltizam etmek üzere akd-i şirket ederler.
Zaman-ı amelde gerek müsavi ve gerek mütefazıl olsunlar.
Yani gerek ameli ale't-tesavi mütaahhid ve zamin olmak şartıyla akd-i şirket eylesinler ve gerek amelin mesela sülüsünü birisi üzerine ve sülüsânını diğeri üzerine şart etsinler.

1386 Madde — Şeriklerden her biri iş takabbül ve taahhüd edebilir.
Biri takabbül edip de diğeri amel etmek dahi caiz olur.
Ve şirket-i sanayi ile şerik olan iki terzinin biri metaı kabul ile...