122

Mudaribin aña riayet etmesi lâzımdır.

1421 Madde Mudarib eğer me’zuniyetinin haricine çıkar ve şarta muhalefet eder ise gâsıb olur ve bu halde ettiği alış verişin kâr ve zararı kendisine aid olur ve mal-ı mudarabe telef olursa zâmin olur.

1422 Madde Rabbü’l-mâl eğer mal-ı mudarabe ile falan mahalle gitme yahud veresiye mal satma deyu nehyetmiş iken mudarib aña muhalefet ederek mal-ı mudarabe ile ol mahalle gidip de mal-ı mudarabe telef olsa yahud veresiye mal satıp da parası batsa mudarib zâmin olur.

1423 Madde Rabbü’l-mâl mudarabeyi bir vakt-i muayyen ile tevkît ettikde ol vaktin geçmesiyle mudarabe münfesih olur.

1424 Madde Rabbü’l-mâl mudaribi azl ettikde azlini aña bildirmesi lâzım gelir. Mudarib kendisinin azline vâkıf oluncaya dek vâki olan tasarrufatı muteber olur ve azline vâkıf olduktan sonra elindeki nukudda tasarruf edemez. Amma elinde nukuddan başka mal bulunursa anı satıp nakde tebdil edebilir.

1425 Madde Mudarib ancak ameli mukabilesinde ribha müstehak olur. Amel ise ancak akd ile mütekavvim olur. Binâenaleyh akd-i mudarabede mudaribe ne mikdar şart edilmiş ise aña göre ribhden hisse alır.

1426 Madde Rabbü’l-mâliñ ribha istihkakı malı iledir. Binâenaleyh mudarabe-i fâsidede ribhin mecmuu aña aid olur ve mudarib anın ecîri menzilesinde olup ecr-i misl alır. Fakat hîn-i akdde şart ettikleri mikdarı tecavüz edemez ve ribh yok ise ecr-i misle dahi müstehak olmaz.

1427 Madde Mal-ı mudarabeden bir mikdarı telef olsa evvelemirde ribhden mahsub olunup re’sü’l-mâle sirayet ettirilmez. Ve eğer ribhin mikdarını tecavüz edip de re’sü’l-mâle sirayet ederse mudarib anı zâmin olmaz.

( Mudarabe )