130

telef olur ve eger dâinin resûlü ise dâinin malından telef olup medyun
borcundan berî olur
1465 madde Bir kimse iki kişiyi birden tevkîl etse vekil oldukları
hususda yalnız birisi tasarruf yâni îfâ-yı vekâlet edemez
fakat husûmete yâhud redd-i vedîaya ve yâhud kazâ-i deyne vekil iseler yalnız
birisi îfâ-yı vekâlet edebilir
ammâ bir kimseyi bir hususa vekil etdikden soñra diğerini dahi re'sen o işe
vekil etdiği sûretde her kangısı îfâ-yı vekâlet etse câiz olur
1466 madde Bir kimse vekil olduğu hususda başkasını tevkîl edemez
meğer ki müvekkil aña izin vermiş ve yâhud re'yiñle amel et demiş ola ol halde
vekil başkasını tevkîl edebilir
ve bu vechle vekilin tevkîl etdiği kimse müvekkilin vekili olur
yoksa ol vekilin vekili olmaz
hattâ vekil-i evvelin azliyle yâhud vefâtiyle vekil-i sânî mün'azil olmaz
1467 madde Eğer vekâletde ücret şart edilib de vekil dahi îfâ-yı
vekâlet eyler ise ücrete müstehak olur
ve eğer şart edilmeyib de vekil dahi ücret ile hizmet eder makûleden değil
ise müteberri' olup ücret isteyemez
* Fasl-ı Sânî *
( Şerâit-i vekâlet beyânındadır )
1468 madde ( 1459 ) maddenin fıkra-i ahîresi hükmünce vekâletin
îfâsı kâbil olacak mertebe müvekkelün-bihin malûm olması lâzımdır
şöyle ki müvekkil iştirâ etdireceği şeyin cinsini beyân etmelidir ve cinsin
tahtında eğer envâ'-ı müteğâyire var ise yalnız cinsin beyânı kâfi olmayıp nev'ini
yâhud bahâsını dahi beyân etmek lâzım gelir
ve eğer alınacak şeyin cinsi beyân olunmaz ise yâhud cinsi beyân olunup
ancak tahtında envâ'-ı müteğâyire olduğu halde nev'i yâ bahâsı ta'yîn kılınmaz ise
vekâlet sahîh olmaz meğer ki vekâlet-i âmme ile tevkîl etmiş ola
meselâ bir kimse baña bir at al deyu diğerini tevkîl etse vekâlet sahîh olur
( ve bir kimse )