132

1474 Madde Müvekkil pirinç al dese vekil olan kimse çarşıda satılan her nevi pirinçden alabilir.

1475 Madde Bir kimse bir hane almak içün diğerini tevkil edecek oldukda mahallesini ve behasını beyan etmelidir beyan etmez ise vekalet sahih olmaz.

1476 Madde Bir kimse bir tek inci yahud bir kırmızı yakut taşı almak üzere birini tevkil edecek oldukda behası kaç guruşa kadar olacağını beyan etmesi lazımdır etmez ise vekalet sahih olmaz.

1477 Madde Mukadderatda müvekkil bihin mikdarı yahud semeni beyan olunmak lazımdır.
Mesela buğday almak içün birini tevkil etdikde kaç kile olacağını söylemesi yahud şu kadar guruşluk buğday deyu mikdar-ı semeni beyan etmesi lazım gelir beyan etmez ise vekalet sahih olmaz.

1478 Madde Müvekkil bihin vasfını beyan olunmak lazım değildir.
Mesela a’lâ ya evsat ya edna deyu vasfının beyanı lazım gelmez.
Şu kadar ki müvekkil bihin vasfı müvekkilin haline muvafık olmak lazımdır.
Mesela bir bargir kiracısı kendisine bir bargir almak üzere birini tevkil etdikde vekil gidüb de yirmi bin guruşluk bir arab atı alamaz alır ise şirası müvekkil hakkında nafiz olmaz yani ol at müvekkil içün alınmış olmayub vekilin üzerinde kalır.

1479 Madde Vekalet bir kayd ile takyid olundukda vekil ana muhalefet edemez eder ise şirası müvekkil hakkında nafiz olmayub aldığı mal kendi üzerinde kalır fakat müvekkil hakkında daha faidelü bir suretde muhalefet eder ise ma’nen muhalefet addolunmaz.
Mesela bir kimse falan haneyi benim içün on bin guruşa al dedikde vekil daha ziyadeye iştira etse müvekkil hakkında nafiz olmayub ol hane kendisinin üzerinde kalır amma on bin guruşdan aşağı ise müvekkil içün alınmış olur kezalik veresiye al deyüb de vekil peşin akçe ile alsa ol mal vekilin üzerinde kalır amma peşin akçe ile al deyüb de vekil veresiye alsa müvekkil içün alınmış olur.

( 1480 )