135

Fasl-ı Salis

( Bey’ vekâleti hakkındadır )

1494 Madde — Alel’ıtlak bey’e vekil olan kimse müvekkilin malını aza çoğa yani münasip gördüğü baha ile satabilir.

1495 Madde — Müvekkil eğer tayin-i semen etmiş ise yani şu kadar kuruşa sat demiş ise vekil ondan noksana satamaz. Satar ise bey’i müvekkilin icazetine mevkufan mün’akid olur. Ve yahut bi-hod noksana satıp da malı müşteriye teslim ettikte müvekkil ona ol malı tazmin ettirebilir.

1496 Madde — Vekil bi’l-bey’ müvekkilin malını kendisi için alsa sahih olmaz.

1497 Madde — Vekil bi’l-bey’ kendi lehinde şehadetleri caiz olmayanlara müvekkilin malını satamaz. Meğer ki değerinden ziyadeye satar ise bey’i sahih olur. Ve bir de müvekkil eğer dilediğin kimseye sat deyu vekâlet-i âme ile tevkil etmiş ise ol halde vekilin onlara dahi semen-i misliyle satması caiz olur.

1498 Madde — Alel’ıtlak bey’e vekil olan kimse müvekkilin malını peşin akçe ile veyahut ol mal hakkında beyn’et-tüccar maruf olan müddet ile veresiye satabilir. Amma örf ve âdete muhalif bir müddet-i tavîle ile satamaz. Ve bir de sarahaten veyahut delâleten bir vech-i peşin satmağa vekil olsa veresiye satamaz. Meselâ müvekkil bu malı bir vech-i peşin sat veyahut şu malımı sat da borcumu ver dese vekil anı veresiye satamaz.

1499 Madde — Bir malın teb’izinde zarar var ise vekil anın nısfını satamaz yok ise satabilir.

1500 Madde — Vekil veresiye sattığı malın semeni mukabilinde rehin ya kefil alabilir. Fakat rehin telef ya kefil müflis olsa vekil zâmin olmaz.

1501 Madde — Müvekkil rehin ile ya kefil ile sat dedikte vekil bilâ-rehin ve bilâ-kefil satamaz.

1502 Madde — Vekil bi’l-bey’ sattığı malın semenini müşteriden almadığı halde...