138

Âmirin fevt olduğu malum olsa ol akçe âmirin terekesine rücu eder ve dâinin terekeye müracaatı lazım gelir.

1515 Madde - Bir kimesne dâinine vermek üzere âhar kimesneye bir miktar akçe verip ancak dâindeki senedine zahriye etmedikçe veyahut ilmühaber almadıkça akçeyi teslim etme deyu nehyetmiş iken memur zahriye ettirmeksizin ve ilmühaber almaksızın akçeyi dâinine verip badehu dâin anı inkar etse ve kabzı ispat olunamayıp da tekrar ol parayı âmirden alsa âmir anı memura tazmin ettirir.

Fasl-ı Hâmis

(Husumete yani murafaaya vekâlet hakkındadır)

1516 Madde - Müddei ve müddei aleyhden her biri dilediğini husumete tevkil edebilir diğerinin rızası şart değildir.

1517 Madde - Husumete vekil olan kimsenin müvekkili aleyhine ikrarı eğer huzur-ı hâkimde ise muteber olur huzur-ı hâkimde değil ise muteber olmaz ve kendisi vekâletden münazil olur.

1518 Madde - Bir kimesne âharı husumete tevkil edip de kendü aleyhine ikrarı istisna eylese caiz olur.
Bu suretde müvekkilin aleyhine vekilin ikrarı sahih olmaz.
(1456) maddenin fıkra-i ahiresine bak.
Ve böyle ikrara mezun değil iken huzur-ı hâkimde ikrar ettiği suretde vekâletden münazil olur.

1519 Madde - Husumete vekâlet kabza vekâleti müstelzim olmaz.
Binaenaleyh dava vekili kabza dahi vekil değil ise mahkumun bih olan malın bil-vekâle kabzına salahiyeti olmaz.

1520 Madde - Kabza vekâlet husumete vekâleti müstelzim olmaz.

Fasl-ı Sâdis

(Azl-i vekile dair olan mesail beyanındadır)

1521 Madde - Müvekkil vekilini vekâletden azl edebilir.
Fakat gayrın hakkı taalluk etmiş ise azl edemez.

(Nitekim)