145

1553 Madde Bir kimse muaccel olan her dürlü alacağını te’cil ve imhal etmek üzere sulh olsa kendisinin hakk-ı ta’cilini iskat eylemiş olur.

1554 Madde Bir kimse meskûkât-ı hâlisa olan alacağını meskûkât-ı mağşûşe olarak almak üzere sulh olsa alacağının sikke-i hâlisa olmak hakkını iskat eylemiş olur.

1555 Madde Hakk-ı şirb ve şüf’a ve hakk-ı mürûr gibi hukuk da’vâlarında yeminden kurtulmak için bedel verip de sulh olmak dahi sahihdir.

* Bâb-ı Râbi’ *

( Ahkâm-ı sulh ve ibrâ beyânında olup iki faslı müştemildir )

* Fasl-ı Evvel *

( Ahkâm-ı sulha dâir olan mesâil beyânındadır )

1556 Madde Sulh tamam oldukda yalnız tarafeynden biri ondan dönemez ve müddeî sulhla bedel-i sulha mâlik olur ve artık da’vâda hakkı kalmaz ve müddeî aleyh dahi bedel-i sulhu ondan istirdâd edemez.

1557 Madde Tarafeynden biri fevt olsa vârisleri dahi onun sulhunu feshedemez.

1558 Madde Sulh eğer muâvaza hükmünde ise tarafeyn anı kendi rızâlarıyla fesih ve ikâle edebilirler ve eğer muâvaza ma’nâsında olmayıp da ba’zı hukukun iskatını mutazammın ise aslâ nakzı ve feshi sahîh olmaz ( 51 ) maddeye bak.

1559 Madde Yeminden halâs için bedel vermek üzere akd-i sulh olundukda müddeî hakk-ı husûmetini iskat eylemiş olur ve artık müddeî aleyh tahlîf olunamaz.

1560 Madde Bedel-i sulh henüz müddeîye teslîm olunmadan küllîsi yâhud ba’zısı telef olduğu sûretde eğer ta’yîn ile müteayyin olan şeylerden ise bi’l-istihkâk zabt olunmuş hükmünde olur.
Ya’nî ‘an ikrâr vâki’ olan sulhda müddeî musâlahun anhın kâffesini yâhud ba’zısını müddeî aleyhden ister ve ‘an inkâr yâhud ‘an sükût vâki’ olan sulhda müddeî da’vâsına rucû’ eyler.