149

Bulundığı cihetle bunlarn rub‘-ı harcı divânca alınmak müşkilâtı müstelzim
olacağı gibi ba‘zı istid‘anâmeler dahi doğrudan doğruya kabûl
olunmakda bulundığından mehâkim-i mezbûreye âid istid‘anâmelerin vürûdunda
mahkemelerin veznelerine verilüb kâ‘ide-i meşrûhaya tevfîkan rub‘-ı harcın
ahz ve istîfâsı ve divân-ı mezkûrun devâir-i dâhiliyesine ve devâir ve mehâkim-i
merbûtasına havâle ve i‘tâ olunub mahkemeye vürûdı târîhinden i‘tibâren
altı mâh mürûruna değin ashâbı tarafından aranılmayan istid‘anâmelerin dâire
ve yâ mahkemenin muhtasarca karârnâmesi mûcebince kaydı bâlâsına şerh
virilerek battâl idilmesi husûslarının divân-ı mezkûrun bi’l-cümle devâir
ve mehâkiminde usûl ve kâ‘ide ittihâzıyla işbu usûl ve mu‘âmelâtın tamâmıyla ve aynıyla
taşra mehâkim-i nizâmiyesinde dahi cereyân etdirilmesi divân-ı mezkûr nezâret-i
celîlesinden vukû‘ bulan iş‘âr ve Şûrâ-yı Devlet’de virilen karâr üzerine
Encümen-i Hâs-ı Vükelâ'da tensîb olunmuş ve sûret-i hâl ta‘mîmen her tarafa tavsiye
ve iş‘âr kılınmış olmağla i‘lân-ı keyfiyet ibtidâr kılındı.

***

( Erbâb-ı cünha ve cinâyetden zabt ve istirdâd olunacak emvâl ve eşyânın )
( Sûret-i fürûhtuna ve müteferri‘âtına )
( Dâir fıkarât-ı nizâmiyedir )

Vukû‘-ı cinâyet ve cünha ile hâsıl olan emvâl zabt olundukdan sonra içinde
hayvânât ve mevâşî ve az zemânda mahv ve telef olmağa müsta‘id eşyâ bulundığı
ve derhâl sâhibi zuhûr itmediği hâlde bir hafta müddet hıfz ve i‘lân
olundukdan sonra Dersaadet’de ise Beytü’l-mâl kassâmlığı ve taşrada ise hükkâm-ı
şer‘ ma‘rifeti ve mecâlis-i idârenin nezâreti ile satılacak ve bunlardan mâ‘adâ
emvâl cânînin ikmâl-i muhâkemesine değin saklanub gerek aynen mevcûd bulunanların
ve gerek minvâl-i meşrûh üzere satılmış olanların cins ve mikdârı Dersaadet’de
ise elsine-i mütenevvi‘ada neşr olunan gazeteler ve taşrada gazete bulunan mahalde
ise gazeteler ve bulunmadığı takdîrde vesâit-i münâsebe ile i‘lân olunacakdır.