15

Bir mahalle tayin olunan memurîn-i muvakkateden biri esnâ-yı memuriyetinde veyahut hitâm-ı memuriyetinde yine evvelki bulunduğu memuriyet dairesinde dîger bir memuriyet-i muvakkate veya dâimeye tayin olunur ve ikinci memuriyeti içün kendisine müceddeden maaş tahsis kılınur ise başkaca harcırah verilmeyecekdir. Ve şâyed maaş tahsis olunmaz ise ilâve edilen memuriyetin derece-i ehemmiyetine göre yine maktû suretiyle veyahut münâsip bir yevmiye tahsis ve itâ kılınacakdır. Ve bunlar bulundukları mahallin dairesi haricinde maaş-ı mahsus ile dâimî veya muvakkat maaşla bir memuriyete tayin kılınur ise bulundukları mevkiden memur oldukları mahalle kadar usulüne tatbikan kendilerine harcırah itâ edilecektir.

Yirmi birinci madde: Dersaadet’den mikdâr-ı muayyen maaş tahsisiyle bir mahal tayin olunmaksızın seyyar suretiyle muvakkaten veya dâimî olarak tayin olunan memurlara harcırah verilmeyecekdir.

Yirmi ikinci madde: Bir mahalle tayin olunan memurînden birinin memur olduğu mahalle hareketinden mukaddem vefâtı veya hasbe’l-icâb infisâli vukûbulur veyahut seyr ü seferi icâb etmeyecek dîger bir memuriyete tayin kılınur ise harcırah istemeğe hak ve selâhiyeti olmayup şâyed acele verilmiş bulunur ise verilen harcırah istirdâd olunmayacakdır. Ve mahal-i memuriyetine kable’l-azîme istifası veyahut kendü tarafından sebebiyet verilmesi üzerine infisâli vukûbulanlar ile harekât-ı seferiyeyi icâb ettirmeyecek bir memuriyete tayin olunanlardan istirdâd olunacakdır.

Yirmi üçüncü madde: Bir mahalle tayin olunup harcırahını aldıkdan sonra mahal-i memuriyetine azîmet etmeksizin hasbe’l-icâb infisâli vukûbulanların üç mâh zarfında dîger bir memuriyete tayin olunduğu veyahut kable’l-infisâl tahvîl-i memuriyet eylediği takdirde evvelki memuriyeti içün aldığı harcırah işbu memuriyeti içün verilmesi lâzım gelen harcırahdan dûn ise bi’l-mahsub üst tarafı itâ ve ikmâl kılınacak ve dûn olmayup da ziyâde ise başka harcırah verilmeyip evvelki verilen harcırahla iktifâ olunacağı gibi