175

Olacaklarından anlar merbut oldukları livanın meclis-i temyiz ve idaresini teşkil
etmek içün re’s-i livaya azimet edeceklerdir ve şayet cümlesi gitmek
istemezler ise mü’temen ve mu’teberlerini taraflarından bi’t-tevkil göndermeleri re’y
ve ittihadlarına muhavveldir fakat bunlardan re’s-i livaya gidecek intihabcılar
her halde bir iki kişiye münhasır olmayacaktır bu suretde her kazadan
gelecek intihabcılar kâmilen içtima ettiklerinde emr-i intihabda mutasarrıf-ı livanın
nüfuz ve müdahalesi munzam olmaksızın meclis-i idare ve temyiz azalığına
aded-i mukarrerinin iki misli intihab edeceklerdir ve anların nısfı vali tarafından
bi’t-tefrik azalığa tayin kılınacaktır.

Altıncı Madde: Liva meclislerine bi’l-intihab tayin kılınacak aza dahi ahali
taraflarından bi’t-tabi haiz olacakları sıfat ve kemalet münasebetiyle vilayet merkezine
giderek vali-i vilayetin ve sair memurinden hiç birinin emr-i intihabda nüfuz
ve müdahaleleri munzam olmaksızın divan-ı temyiz ile meclis-i idareye aded-i
muayyenin iki misli aza intihab edeceklerdir ve madde-i sabıkada muharrer usule
tatbikan bunların nısfı kezalik vali tarafından azalığına tefrik ve tayin ve bab-ı
aliden memuriyetleri tasdik kılınacaktır.

Yedinci Madde: Gerek liva ve gerek vilayet merkezleri içün intihaba konulanlar
münhasıran merkezlerin erkan ve ahalisinden bulunmak meşrut olmayıp kazalardan
livalara ve sancaklardan vilayet merkezlerine aza intihabı memnu olmayacaktır
ve azalığın sıfat-ı mevzua ve matlubesini haiz olmak şartıyla kura
intihabcılarından dahi kazaya aza intihab ve tayin olunabilecektir.

Sekizinci Madde: Mehakim ve mecalisin aded-i azası mikdar-ı tesavide ibka
olunup fakat kaza deavi meclislerine üçer nefer azasına bir aza
daha ilave kılınacak ve bu azanın nısfı müslim ve nısfı gayr-i müslim olmak
üzere milel-i muhtelife beyninde taksim olunacaktır ahalinin sunufu üçden
ziyade olur ise her sınıfdan bir sene münavebe suretiyle aza alınacaktır.

Fi 2 Zilhicce sene 1292 ve fi 18 Kanun-ı Evvel sene 1291