183

Tasdikine dair lâzım gelen i'lâm ve gerek senedinin tanzim kılınması
Sekizinci madde: Zikr olunan i'lâm veyâ senedin hükmü Bâb-ı Âlî marifetiyle
mâl yedinde bulunan şahsa resmen tebliğ olunarak mucibince icra olunması
ve tebliğ olununcaya kadar mâl yedinde bulunan şahıs mâl-ı mezkûru kendi nezdinde
tevkif ile hiç bir kimesne tarafına vermemeğe kanunen mecbur olub verdiği
suretde lâzım gelen tarafa tazmini zimnında mes'ul tutulması.

Fî 25 Rebiülevvel sene 74

***

( Dersaadet Cemiyet-i Sulhiyesine Dair Talimat-ı Muvakkate )

Birinci madde: Cemiyet-i mezkûre evvelâ sulhan kabil-i tesviye olub müsted'înin
muvafakatiyle doğrudan doğruya havale olunacak her nevi da'âvîyi
sulhan bitirmeğe ve saniyen müddeî tarafından iddia olunub müddeî aleyhin taht-ı
ikrar ve i'tirafında bulunan ve kezalik havale olunan her dürlü hususatın
tesviyesine ve salisen bidayet ve istinaf ve temyiz mahkemelerinin rü'yet ettikleri
da'âvîde usul-i muhakeme-i ticaret nizamnamesinin otuz sekizinci maddesinde
gösterildiği vechile ind-el-muhakeme sulhan tesviyesi icab edib de karar
i'dadîsi ile havale olunan da'âvîyi muhakemesine girmeksizin yalnız sulhan
rü'yete me'murdur.

İkinci madde: Sulhan tesviye-i maslahat olunmak üzere doğrudan doğruya
havale olunan müsted'iyâtı heman ba'd-el-mütâlaa havale cemiyeti nizamnamesinin
yedinci ve sekizinci ve dokuzuncu ve onuncu ve on birinci maddelerinde muharrer usule
tevfikan tarafeyni ve icabı halinde husus-ı müddeâya ma'lûmatı olanları celb
ve isticvab ederek mücerred sulh içün lüzumu olur ise iktiza eden defâter
ve evrak ve senedata dahi müracaat eyleyerek işe lâyıkıyla kesb-i ma'lûmat
ettikden sonra tarafeyni sulha davet eder.

Üçüncü madde: Kitab-üs-sulh ahkâmına tatbikan maslahatın sulhan tesviyesi
kararlaştırıldığı halde müddeî ve müddeî aleyhin rıza ve muvafakatlerini ve bu vechle...