185

Dokuzuncu Madde — Sekizinci maddede muharrer suver-i selâseden medyunun muvafakatile birincisinin icrası halinde dayinde sened veyahut sair evrakı var ise reddettirilmesi ve olmadığı surette dayinden battalname ahzile medyuna verilmesi ve eğerçi rıza-yı tarafeyn ile ikinci veya üçüncüsüne karar verilir ise o vakit icab-ı maslahata göre üçüncü ve dördüncü ve beşinci ve altıncı maddelerde muharrer muamelatın bunda dahi icra olunması lazım gelir.

Onuncu Madde — Tarafeynin veya ehad-i tarafeynin adem-i muvafakatinden naşi sekizinci maddede beyan olunan suver-i selâseden birisine karar verilemediği takdirde o işe dair bulunan arzuhal medyunun vaki olan ikrarile tesviye-i maslahata mani olan esbab arzuhali üzerine tahrir olunarak merciine havalesi zımnında havale cemiyetine iade kılınır.

On Birinci Madde — Sulhan tesviyesiçün mehakimden havale olunan mesalih hakkında dahi balada muharrer muamelenin icrasile beraber sulhun in'ikadı halinde o işi havale eden mahkemeye dahi bir varaka-i memhure ile tahrir-i malumat verilecektir.

Fi 10 Şevval sene 292

( Bab-ı Zabtiyede teşkil olunan tefrik cemiyeti talimatı )

Şeref-taalluk buyurulan irade-i seniye mucibince Bab-ı Zabtiyede teşkil kılınan tefrik cemiyeti içün taraf-ı devletten bir reis ve iki aza tayin kılınmış olduğundan bunlar her gün bilâ-tatil devam ederek münazaat ve cinayat mevakinden zabtiye merkezlerine isal olunan eşhasın habs ve tahliye-i sebillerine hüküm oluncaya kadar bilâ-sual ve lâ-cevab tul-i müddet tevkifhanelerde kalmaları maddesine dikkat ve itina edecektir.

Zabtiyelerin doğrudan doğruya tutup getirecekleri veyahut ba-jurnal merkezlerden gelecek adamların sebeb-i ahz ve giriftile jurnalleri cemiyetçe...

13