188

İran şehbender ve şehbender vekilleri ve tercüman ve kavasları sair düvel-i mütehabbe
konsolos ve vekil ve tercüman ve kavaslarının nail oldukları imtiyazata mazhar
edileceklerdir.

Memalik-i Mahruse-i Şahanede vefat eden tebaa-i İraniyenin terekelerine müteallik
muamelat-ı tahririye ve saire kema fi’s-sabık İran şehbenderlerine aid olacak
ve tebaa-i Devlet-i Aliye canibinden bir İranlı terekesi aleyhine ikame olunacak deavi
sair davalar gibi aid olduğu mehakim ve mecalis-i mahalliyede nizami vechle rüyet
kılınacaktır.

Bir İranlı Devlet-i Aliye tabiiyetine girmek ister ise Tabiiyet-i Osmaniye Nizamnamesine
tatbikan iktizası icra olunacaktır.

Ve başkaca bir nizamname yapılıncaya kadar tebaa-i İraniyenin Memalik-i Şahanede emlak
tasarrufuna selahiyetleri olamayacaktır.

İran tebasının tebaa-i Devlet-i Aliyeden olan nisa ile izdivaçları kat’iyen ve kaviyen
men olunmuş olduğundan bu memnuiyetin devamı zımnında Hükümet-i Seniyece tedabir-i
mükemmele ittihaz olunacak.

Ve tebaa-i İraniye ile düvel-i ecnebiye-i saire tebası beyninde ticaret ve saireye dair
tekevvün edecek bilcümle deavi ve münazaat bu ana kadar mer’iyyü’l-icra olan
kaideye tatbikan rüyet ve tesviye edilecektir.

İşbu tadad olunan hususattan maada mevad ve muamelatda tebaa-i İraniyenin
sair düvel-i ecnebiye tebasının mazhar oldukları imtiyazat ve müsaadata
nailiyetleri umur-ı tabiiyeden bulunup hususat-ı meşruhada ol vechle amel
ve hareket olunmasına bi’l-istizan İrade-i Seniye-i Hazret-i Hilafetpenahi dahi
şerefsadır olmuş olmakla ve keyfiyet sair taraflara dahi bildirilmekle taraf-ı
devletlerinden dahi ana göre ifa-yı muameleye himmet buyurulması tavsiyesiyle şukka

Fi 12 Muharrem sene 291

(Fi)