195

(Mehâkim-i şer’iye ve nizâmiyeden verilen i’lâmlarda mahkûmun bih mebâliğin)
(Cinsinin tasrîhine dâir tezkire-i sâmiye)

Ma’lûm olduğu vechle muâmelât-ı ahz u i’tâda semen-i müsemmâ olan akçe
bir cinse münhasır olmayarak meskûkât-ı ecnebiyeden başka Devlet-i Aliye nukûdu
bile Mecidiye altun ve gümüş ve beşlik ve bakır gibi ecnâs-ı adîde üzere
bulunduğundan ve bunlardan her cins sikkenin râyici borsa muâmelâtına tâbi’ olup
vakit vakit tezâyüd ve tedennî eylediğinden mehâkim-i şer’iye ve nizâmiyeden verilen
i’lâmâtda mahkûmun bih olan akçenin esnâ-yı tahsîlinde ekseriyâ nizâ’ ve tereddüd
vukû’ bulmakda olduğuna ve eğer ba’zı i’lânlarda akçenin cinsince hîn-i
murâfa’ada ihtilâf hâsıl olduğu veyâ cins ve aded olarak iddiâ kılındığı
hâlde meblağ-ı mahkûmun bihin cins ve adedi tasrîh ile tahsîli gösterilmekde
ve ol vechle îcâbı icrâ olunmakda ise de ekser i’lâmâtda akçenin cins
ve adedi gösterilmeyip guruş üzerine hükm olunmağla tahsîline teşebbüs
olundukda ba’zıları vermiş olduğu akçenin Osmanlı lirası yüz guruş
hesâbıyla i’tâ olunduğundan yine o hesâb ile tahsîlini iddiâda ve medyûnlar dahi
hükm guruş üzerine olduğundan çarşu râyici ve bakır akçe hesâbı üzere
vermek ısrârında bulunduklarına binâen ba’d-ezîn mehâkim-i şer’iye ve nizâmiyeden
verilecek i’lâmâtda iddiâ olunan akçe cins ve aded üzerine olmayıp da
guruş bulunduğu takdîrde buna bir cins ta’yîniyle ya’ni bakır veyâ metalik veyâhûd
altun ve gümüş veyâ karâr verilecek âhar cins akçe her ne ise ânın içün
takdîr olunacak bir fî’ râyicin dahi berâberce tasrîh ile meselâ mahkûmun bih
şu kadar guruşun Mecidiye yüzlük yâhûd Fransız altunu veyâ Mecidiye ve Taler bundan
her biri şu fî’ râyic ile tahsîl kılınmasının beyân ve îzâh olunması zımnında
hükkâm-ı kirâm ile mehâkim-i nizâmiye rüesâsına tenbîhât-ı lâzıme icrâsı husûsunun
taraf-ı âlî-i meşîhat-penâhî ile sâir îcâb edenlere iş’ârı İcrâ Cemiyeti’nden
ifâde ve keyfiyet lâzım gelenlere iş’âr kılınmağla ol vechle iktizâ-yı hâlin icrâ
olunması siyâkında

Cemâziye'l-evvel sene 289 ve Temmuz sene 288