218

Onuncu Madde Süvari sınıfı ifa-yı vazifeleri esnasında bir çift piştov ile bir de kılıç taşıyacaklardır.

On Birinci Madde Hademe ile muhzırların elbise ve eşya bahaları kendi taraflarından tesviye edilecektir.

* Fasl-ı Râbi *

( Hademe ile Muhzırların Vazifeleri Beyanındadır )

On İkinci Madde Piyade hademe ile muhzırların vezaifi meclis idarelerle mehakim-i nizamiye kapularında bekleyüp mecalis ve mehakimin vazifeleri muktezasından olmak üzere kendilerine ifade ve irae olunan memuriyet ve hizmeti ifa etmek ve verilen mühürlü ihzar pusulalarını merkez kaza dahilinde olarak celb ve ihzar olunacak kimselere tebliğ eylemekden ibaretdir.

On Üçüncü Madde Süvari sınıfının merkez dahilinde vazifeleri piyadenin aynı olup fakat merkezin haricinden celb ve ihzar olunacak ademlere tebliği lazım gelen pusulaları ve evrak-ı saireyi bunlar isal edeceklerdir.

On Dördüncü Madde Kabahat ve cünhaya ve cinayete müteallik ef'alden dolayı tevkif olunan eşhas talimat-ı mahsusasında beyan kılındığı üzere kemâkân zabıta nezareti altında getirilmek üzere muhzırlar yalnız deavî-i hukuk-ı adiyeden ve bu gibi cezaya müteallik olmayan mevaddan dolayı taht-ı tevkifde bulunanları mahakime celb edeceklerdir.

On Beşinci Madde Mehakim ve mecalise celb ve ihzar olunacak eşhas hakkında hademe ve muhzırların muamele-i bâride göstermeleri kaviyyen memnu olup eğerçi on ikinci ve on üçüncü maddelerde beyan olunan vezaifin icrasında bir gûne maniaya tesadüf ederler ise derhal bulundukları mahkeme veya meclisin heyetine ifade-i keyfiyet eyleyeceklerdir.

On Altıncı Madde Hademe ve muhzırların süvari ve piyadesi vali ve mutasarrıf ve kaymakamlarla memurînin ve hiç bir kimsenin hizmet-i zatiyesinde istihdam olunamazlar ve erkenden hizmetleri başında bulunup ve süvariler dahi hayvanlarıyla beraber irae edilecek mevki-i muayyende durup vazifelerine aid emri icraya amade olurlar.

(On)