276

Yevmiyesi üstünün bakıye-i masârifâtı kâmilen idhâl olunmak üzere tûl-i müddet tevkîf edilmeyüb şuhûr-ı sâbıka yevmiyelerinin kat‘ ve devr olundığı zamânlar gibi kapadılarak mevcûd sandık ile henüz te’diye olunmayan masârifât-ı sene-i cedîde Martına devr idilecek ve işbu masârifâtın mikdâr-ı devrini mübeyyin bir kıt‘a düyûn defteri bi’t-tanzîm bir nüshası Şubat cedveliyle berâber kazâlardan livâlara ve livâlardan vilâyete ve vilâyetlerden hazîneye gönderilecekdir.

Sâdisen sâl muhâsebeleri kazâlardan ba‘zı sebeble Mart gâyetinde yetişdirilemez ise nihâyet Nîsân evâsıtına kadar behemehâl merkez-i livâya gönderileceği gibi livâlardan dahi Mayıs nihâyetine kadar tedkîkâtı bi’l-icrâ tanzîm olunacak sancak sâl muhâsebeleri mutlakâ merkez-i vilâyete ve orada da Temmûz hitâmına değin îfây-ı mu‘âmelâtiyle yapılacak vilâyet sâl muhâsebesi hazîne-i celîleye gönderilüb bu hâlde bir vilâyet sâl muhâsebesi beş mâh müddetde yapılarak irsâl kılınmış olacağından işbu evkât-ı mu‘ayyene tecâvüz idüb de yine gönderilmediği takdîrde birinci ve ikinci mâddelerde gösterilen mücâzât sebebiyyet virenler hakkında derece derece icrâ idilecekdir.

Sâbi‘an doksan iki senesi Martının duhûlünde kazâ ve livâ ve vilâyetlerde tedâhüle kalmış cedvel yâ sâl muhâsebesi bulunur ve tebdîl dahi vukû‘ bulur ise bile gerek Mart cedvelinin ve gerek sâl muhâsebesinin tanzîm ve irsâli tedâhüle kalanların arkası alınmasına ta‘lîk olunmayub Martdan i‘tibâren sene-i cedîde cedâvil ve muhâsebâtı mevâd-ı sâbıkada gösterilen müddetlerde sırasıyla gönderilüb kat‘an te’hîr olunmayacağı gibi tedâhüle kalan cedvellerden beher mâh birer takım gönderilecekdir.

Fî 13 Safer sene 93 ve fî 26 Şubat sene 91

( Menzilhâne )