299

Mikdarını muayene edip noksanı var ise ikmalini taleb etmek üzere kontrato tarihinden ve şayet ağaçların tamgalanması kontratodan sonra vaki olmuş ise eşcarın tamgalandığını mübeyyin verilen ilmühaber tarihinden itibaren bir aydan iki aya kadar mültezime mühlet verilecek ve zikr olunan mühlet-i münkazıye olduktan sonra mültezimin bu babda vukû bulacak talebine havale-i sem’ ve itibar olunmayacağı kontratoya derc edilecektir.

Fasl-ı Sâlis

( İtlaf olunacak derecede sakız ihrac edilecek çamların )
( Kerestesinin dahi birlikte ilzam ve ihalesi halinde )
( Olunacak muamelât beyanındadır )

Dokuzuncu Madde — Tüccar tarafından vukû bulacak taleb üzerine çam ağaçlarının sakızıyla kerestesinin me’an ihalesi kabil olduğu halde işbu talimatın fasl-ı sânisinde muharrer olan kavaidin cümlesi mer’i olacak ve zikr-i âtî tadilat dahi icra olunacaktır.

Evvelâ: Âdi kereste kat’ında kesilmesi caiz olacak ağaçların kâffesi ağacı itlaf edecek derecede çam sakızı ihrac olunmak üzere mîrî çekiciyle nişan olunacaktır.

Sâniyen: Ağacı itlaf edecek derecede çam sakızı ihrac olunabilecek olan eşcardan mültezim her ne suretle murad eder ise bilâ kayd ü şart sakız istihsaline muhtar olacaktır.

Sâlisen: Eşcar-ı mezkûreden alınacak kerestenin cins ve mikdarı hakkında bir gûna taahhüd ve te’min altında olmamak üzere esmanı mümkin olduğu mertebe ağaç başına kat’ ve tayin olunup ancak tüccar tarafından taleb olunduğu halde mukaab metro itibariyle tayin-i fiyât edilmesi caiz olacaktır.

Fî 26 Şubat Sene [12]89