309

iden kimse bedelini kabul iden kimseye göndermiş oldığını isbat ider ise o dahi bu suretle def'-i da'va itmiş olub bu takdirce hamili anın bedelini yalnız kabul idenden da'va ide bilür.

Yirmi Altıncı Madde — Hiç bir kimsenin yahud bir şirket ve ya banka ile devair-i resmiyenin damgalı evraka yazılmamış ve pul vaz' olunmamış olan poliçe ve tüccar ve efrad beyninde mütedavil olan sair senedatı keşide ve ya kabul ve ciro ve te'diye ve kendü ve ya aharı hesabına tahsil itmesi memnu'dur. Bu memnu'iyetin hilafında hareket idenler gerek me'murinden olsun ve gerek efrad-ı nasdan olsun senedin havi oldığı meblağın resm-i nizamisinden başka yüzde üçi hesabıyle ceza-yı nakdi dahi virecekdir.

Yirmi Yedinci Madde — İşbu nizamname mucibince damga usulü cari olan yerde damgasız ve pulsuz kağıd üzerine yazılan ve alınub satılmağa kabiliyeti olan poliçe ve bono ve emr ve havale senedi ve tüccar beyninde mütedavil olan sair evrakın va'deleri hulul itmeksizin ve ciro olunmaksızın üzerine pul yapışdırılmak caiz olub fakat bu suretde nizamen yapışdırılması lazım gelen pulun üç kat değerinde olan pul vaz' olunacakdır.
Ve eğer va'desi hulul itmiş ve yahud ciro olunmuş ise on dokuzuncu madde hükmünce havi oldığı meblağ üzerinden resmiyle yüzde üçi mikdarı ceza-yı nakdi alınacakdır.

Yirmi Sekizinci Madde — Derece-i nizamiyesinden dun varakaya yazılmış ve yahud derece-i nizamiyesinden eksik pul yapışdırılmış olan senedatın noksanı ne mikdar ise ikmal etdirildikden sonra ceza-yı nakdisi yalnız noksanı üzerine alınacakdır.

Yirmi Dokuzuncu Madde — Sahte evrak-ı sahiha ve damga ve pul yapanlar ve bilerek satanlar ve sürmeğe sa'y idenler hakkında ceza kanunname-i hümayununun yüz kırk dokuzuncu maddesinin fıkra-yı evveliyesi hükmünce on seneden ziyade olmamak üzere muvakkat kürek yahud kal'a-bendlik cezası icra olunur ve bilerek müsta'mel pul kullananlar madde-i mezkurenin fıkra-yı ahiresi hükmünce üç sene hapis olunurlar.