31

ve kâmilen memnu olan angarya usulünden masun olmak esasiyle müceddeden vaz olunan talimat-ı mahsusaya tabi olacaktır.

Otuzuncu Madde
Hristiyan terekelerinde zuhur eden vasiyetlerin ahkâmı muhafaza olunarak veli ve vasi altında bulunan eytam-ı müslime ve gayr-i müslime emvaline dokunulmayıp nizam ve kaidesine tevfik-i hareket edilecektir. Ve vasilerin ızrar-ı eytama tasaddilerinden şikayet olunur ise taht-ı himayet ve sıyanete alınıp esbab-ı şikayet temyiz ve tahkik olunacaktır.

Otuz Birinci Madde
Valiler umur-ı mülkiye ve maliye ve zabıtadan daire-i memuriyetleri mülhakatına müteallik mesalihi mezuniyetleri üzere bilâ-tehir icra ve mutasarrıflık ve kaymakamlıklara ol babda doğrudan doğruya evamir-i lazıme ita etmeğe ve devletçe karargir olan mevaddı icra ettirmeğe mezundurlar. Ve maiyetlerindeki memurin-i mülkiye kendilerine müracaat edeceklerdir. Fakat umur-ı hukukiye bu kayıddan müstesna tutularak andan dolayı ledü’l-iktiza mutasarrıflıkların Adliye Nezareti’ne müracaatları ve vaki olacak karar ve işarı icra etmeleri ve o sırada valiye dahi malumat vermeleri lazım gelecektir.

Otuz İkinci Madde
Valiler daire-i vilayet dahilinde bizzat dahi icra-yı teftişat ederek işlerin ale’d-devam hüsn-i cereyanına nezaretten hali olmayacaktır.

Fasl-ı Rabi

( Mutasarrıf ve Kaymakamların suret-i harekâtı beyanındadır )

Otuz Üçüncü Madde
Mutasarrıflar bulundukları sancakta valinin vekili olup kendilerinin müfredat-ı vezaifi işbu talimat-ı umumiyede vilayete tahsis edilen vezaiften ibarettir. Valinin nezareti sancaklara şamil bulunduğu gibi mutasarrıfların nezareti dahi taht-ı idarelerindeki sancağın kazalarına şamildir.

Otuz Dördüncü Madde
Mutasarrıflar mezun oldukları mevaddın icraatını kaymakamlara tebliğ ve havaleye ve anın fevkindeki umuru validen istizan ile mevki-i icraya koymağa memurdurlar.