339

( Duhan resmi hakkında nizamnamedir )

* Fasl-ı Evvel *

( Tütün zer‘ine dairdir )

Birinci Madde — Bin ikiyüz doksan sene-i maliyesinden itibaren her tütün zer‘
etmek isteyen kimesne tütün ziraat edeceği mahal yarım dönümden noksan
olmamak ve zer‘ eylediği tütünün gerek tarlada ve gerek sırık ve hevenkte
tahminile tayin-i miktarı ve yetiştirdiği mahsulün ahara füruhtu emrinde
işbu nizamnamede münderiç olan usul ve şuruta tabi olmak şartile hiç
bir mahalden izin ve ruhsat talep etmeksizin kemâ-kân tütün zer‘i hususunda
serbest olacakdır

* Fasl-ı Sani *

( Tütün mahsulünün tahmin ve tahriri hakkındadır )

İkinci Madde — Her kaza rüsumat memuru tütün mahsulünün mevsim
idrakinde kaza kaymakamına tahriren müracaatle tütünler kemâlini bulup daha
yaprakları koparılmağa başlanmazdan yani tarladan kaldırılabilecek hale gelmezden
evvel evvel kaza dahilinde mezru bulunan tütünün kesretine göre bir ve icabı
halinde müteaddit tahrir kolları tertip ve her kol için kazanın meclis-i
idaresi marifetile ve rüsumat memuru hazır olduğu halde rüsumat
tarafından olmak üzere ikişer nefer ehl ve erbab-ı muhammin intihab olunarak
ve rüsumat idaresi tarafından mahsusan tayin olunacak memur ve kâtibin
refakatine verilerek tahrire çıkarılacak ve bunlar tütünü tahrir edecekleri
mahalle ve sularında orası karye veyahut nahiye ise ihtiyar meclisi
ve kaymakamlık ile mutasarrıflık ve merkez-i vilayet olan şehir ve kasaba olduğu
takdirde idare meclisleri marifetleriyle rüsumat memuru hazır bulunduğu
halde oranın tütün züra‘ından ileri gelenleri celb ile onlar tarafından
züra‘ için diğer iki nefer daha muhammin intihabile fırka-i tahririyeye terfik
olunduktan ve tayin olunacak günde mahsulü başında bulunması züra‘a güzelce
ilan ve ihbar edildikten sonra cümlesi birlikte ve bizzat her tütün

22