35

35

Dairece ashab-ı alâkadan ve tebaa-i Devlet-i Aliyye’den olması ve otuz yaşından
aşağı olmaması ve doğrudan doğruya lâ-akal devlete senevi yüz guruş vergi
verenlerden bulunması ve bir cinayetle mahkûm bulunmamış olması meşruttur.

On birinci madde: Müdir dairenin oldukça okuyup yazmak bilmesi lâzımdır
ve bu müdirleri ahali taht-ı emniyetlerinde olarak intihab edeceklerinden bittabi
anlar kefil ve zamindir ve müdirler ahali taraflarından intihab olunduktan sonra
her dairenin tabi olduğu kaza kâim-makamlığı vasıtasıyla ve liva mutasarrıflığının
işarıyla vali-i vilayet tarafından memuriyetleri ba-tahrirat tasdik
ve icra kılınacaktır.

On ikinci madde: Ahali-i müslime imamları ve ahali-i gayr-i müslime papasları ve mekteb
muallimleri ile bilfiil memuriyet-i devletde bulunanlar müdirliğe intihab olunamazlar.

On üçüncü madde: Bir nahiye dairesinin ahalisi umumen bir sınıf tebaadan
mürekkeb ise müdir ve aza ve muavin dahi münhasıran kendi sınıflarından intihab
edilir. Müslim ve gayr-i müslim ahaliden mürekkeb ise meclis azasının nısfı müslim
ve nısfı gayr-i müslim ahaliden intihab olunacak ve ekseriyet-i nüfus kangı sınıfda
ise müdir anlardan ve muavin dahi diğer sınıfdan olacaktır.

On dördüncü madde: Müdir ve meclis azası onuncu ve on birinci maddelerde
muharrer sıfatı haiz olan daire ahalisi tarafından intihab olunur şöyle ki
daire yalnız bir karyeden ibaret ise ahalisi bir yevm-i muayyende birleşip müdir
ve aza-yı meclisi intihab ederler ve birkaç karyeden ibaret ise her köy
ahalisinin umumen ve sahihan emin olacakları adamlar merkez-i dairede birleşip
kezalik müdir ve azanın intihabatlarını icra eylerler.

On beşinci madde: Müdir ve aza ilk içtimalarında içlerinden birisini ekseriyet-i
ara ile muavinliğe tefrik ederler. İşbu muavin müdirin gıyabında icra-yı vekalet
edecek ve huzuru halinde azadan ma'dud olacaktır.

On altıncı madde: Müdirler iki senede bir tebdil olunacaktır ve azanın
beher sene nısfı değiştirilecektir. Müdir ve azanın tekrar intihabları caizdir.