402

Ama nâtık olan kimesnenin işaretiyle olan ikrarı muteber değildir.
Mesela bir kimesne nâtık olan kimesneye falanın sende şu kadar guruş hakkı var mıdır
dedikde ol kimesne başını eğmesiyle ol hakkı ikrar etmiş olmaz.

Bab-ı Salis
( İkrarın ahkâmı beyanında olup üç faslı müştemildir )

Fasl-ı Evvel
( Ahkâm-ı umumiye beyanındadır )

1587 Madde — Yetmiş dokuzuncu madde mucibince kişi ikrarıyla ilzam olunur.
Ancak hâkimin hükmüyle tekzip olunursa ikrarı hükümsüz kalır.
Şöyle ki bir kimesnenin satın alıp da yedinde bulunan bir şeye âhir kimesne müstahak
çıkarak anı iddia etmesi üzerine lede’l-muhakeme ol kimesne bu şey falanın malı
idi bana sattı demiş olduğu halde ol kimesne davasını ispat ve hâkim
dahi hükm ettikde müşteri bayie rücu ile semen-i mebii ondan istirdad eyler.
Ve gerçi hin-i muhakemede ol şey bayiin malı idüğünü ikrar ile müstahakkın
davasını inkâr etmiş ise de hâkimin hükmüyle tekzip olunmuş idüğünden
ikrarının hükmü kalmadığı cihetle mani-i rücu olamaz.

1588 Madde — Hukuk-ı ibadda ikrardan rücu sahih olmaz.
Şöyle ki bir kimesne falan kimesneye şu kadar guruş deynim vardır dedikten sonra
ikrarımdan rücu ettim demesine itibar olunmayıp ikrarıyla ilzam olunur.

1589 Madde — Bir kimesne vuku bulan ikrarında kâzip olduğunu iddia etse
mukarrun leh anın kâzip değil idüğüne tahlif olunur.
Mesela bir kimesne falandan şu kadar guruş istikraz ettim deyu bir kıt’a sened
verdikten sonra vakıa o kadar guruş istikraz ettim deyu sened verdim
ise de henüz meblağ-ı mezburu ondan almadım dese anın bu ikrarında kâzip olmadığına
mukarrun leh tahlif olunur.

1590 Madde — Bir kimesne diğer kimesneye zimmemde şu kadar guruş alacağın
vardır deyu ikrar ettikde ol kimesne dahi ol alacak benim değildir falan
şahsındır deyu ikrar ve o şahıs dahi anı tasdik eylese ol alacak
ikinci mukarrun lehin olur lakin hak-ı kabzı evvelki mukarrun lehin olur yani
(ikinci)