411

1720 Madde Müddeâbihin malûmiyeti işaret ile yahod vasf ve tarif iledir.
Şöyle ki ayn-ı menkul olduğu takdirde meclis-i muhakemede hazır ise aña işaret kâfidir ve hazır değil ise vasf ve tarif ve kıymeti beyan ile malûm olur ve akar olduğu takdirde hududunuñ beyanile tayin olunur ve deyn ise cins ve nev‘ ve vasf ve mikdarı beyan olunmak lâzım gelir nitekim mevad-ı âtiyeden müttazih olur.

1621 Madde Müddeâbih ayn-ı menkul olduğu halde hazır bi'l-meclis ise müddeî aña eliyle işaret ederek işte bunlardır bu adam aña bigayr-ı hakk vaz‘-ı yed ediyor alıverilmesini taleb ederim deyu da‘va eder ve eğer hazır bi'l-meclis olmayıp ancak masrafsız celb ve ihzarı mümkün ise da‘vada ve şehadet veyahud yeminde aña böylece işaret olunmak üzere meclis-i hükme getirdilür.
Ve eğer masrafsız ihzarı mümkün değil ise müddeî anı tarif ve kıymetini beyan eyler fakat gasb ve rehin da‘valarında kıymetiniñ beyanı lâzım gelmez meselâ bir zümrüd yüzüğü gasb etdi dese ve kıymetini beyan etmese ve hattâ kıymetini bilmem dese bile da‘vası sahih olur.

1622 Madde Müddeâbih eğer cins ve nev‘ ve vasıfları muhtelif a‘yân ise cümlesiniñ mecmu‘ kıymetini zikr etmek kâfi olur her biriniñ başka başka kıymetlerini tayin etmek lâzım gelmez.

1623 Madde Müddeâbih akar ise hîn-i da‘va ve şehadetde beldesi ve karyesi veya mahallesi ve zukağı ve hudûd-ı erba‘ası yahod sülâsesi ve hudûdunuñ sâhibleri var ise anlarıñ ve baba ve dedeleriniñ isimleri zikr olunmak lâzımdır fakat meşhur ve ma‘rûf olan adamıñ yalnız isim ve şöhretini zikr etmek kâfidir baba ve dedesiniñ isimlerini zikre hâcet yokdur.
Kezâlik ol akar eğer şöhretine mebnî tahdidden müstağni ise gerek da‘vada ve gerek şehadetde hudûdunuñ beyanı şart değildir.
Ve bir de müddeî eğer şu senedde hudûdu muharrer olan akar benim mülkümdür deyu da‘va eder eder ise sahih olur.