432

1659 Madde — Bir kimse bir malı mülkümdür deyü diğer kimesne huzurunda âhara bey‘ ve teslim ettikde ol kimesne görüp de bilâ-özr sükût etmiş iken sonradan ol mal benimdir yahud anda hissem vardır deyü dava etse nazar olunur eğer ol kimesne bayiin akribasından yahud zevc zevceden birisi ise işbu davası mutlakâ istima olunmaz ve eğer ecanibden ise ol vechile yalnız meclis-i bey‘de bulunması davasının istimaına mani olmayıp ancak meclis-i bey‘de hazır olduktan başka müşterinin bir müddet ol mülkde ebniye yapmak yahud yıkmak veyahud ağaç dikmek gibi tasarruf-ı emlak ile tasarrufunu görüp de bilâ-özr sükût ettikden sonra ber-vech-i bâlâ benim mülkümdür yahud anda hissem vardır deyü dava etse kezalik istima olunmaz.

* Bâb-ı Sânî *
( Mürûr-ı zaman hakkındadır )

1660 Madde — Deyn ve vedia ve mülk ve akar ve miras ve akarat-ı mevkufede mukataa yahud icareteyn ile tasarruf ve meşruta tevliyet ve galle davaları gibi asıl vakfa ve umuma aid olmayan davalar on beş sene terk olunduktan sonra istima olunmaz.

1661 Madde — Asıl vakıf hakkında mütevelli ve mürtezikanın davaları otuz altı seneye kadar istima olunur. Amma otuz altı sene mürûr ettikden sonra artık istima olunmaz. Meselâ bir kimse otuz altı sene bir akara mülkiyet üzere mutasarrıf olduktan sonra bir vakfın mütevellisi ol akar benim vakfımın müstegallatındandır deyü dava etse istima olunmaz.

1662 Madde — Tarik-i hâs ve mesil ve hakk-ı şürb davaları eğer mülk akarda ise on beş sene mürûr ettikden sonra istima olunmaz. Ve eğer akarat-ı mevkufede ise mütevellinin anları otuz altı seneye kadar davaya salahiyeti vardır. On sene mürûrundan sonra arazi-i miriye davaları istima olunmadığı gibi arazi-i miriyedeki tarik-i hâs ve mesil ve hakk-ı şürb davaları dahi on sene terk olunduktan sonra istima olunmaz.

(1663)