431

( Tenbih-i Resmî )

Âsâr-ı nâdireyi hâvî kadîm ve meşhûr şehirlerde vâkı‘ kal‘a dîvarlarında ve ebniye-i sâire harâbelerinde bulunan üzerleri yazılı ve kabartmalı mermerler şunuñ bunuñ tarafından ahz ve istîsâl olunarak ve büyük kıt‘ada olanları kırılarak moloz taşı yerine kullanılmakda ve ba‘zan kireç ocaklarında hark edilmekde oldığı istihbâr idilüp şu hâliñ devâmı ise antika nev‘inden olan o misillü âsâr-ı meşhûre ve mu‘tebereniñ mahv ve ziyâ‘ını îcâb eyleyecegi cihetle rehîn-i kabûl ve cevâz olamayacagından ba‘demâ bi’l-cümle kadîm ve meşhûr şehirlerde kâin kal‘a ve ma‘bed ve sarây ve hâne ve’l-hâsıl ‘umûm ebniye-i ‘atîka harâbelerinden hîç bir şahsıñ taş çıkarmak ve kırmak gibi harekâtına meydân verilmeyüp bâlâda envâ‘ı ta‘dâd olunan ve sâir âsâr-ı ‘atîkadan ma‘dûd bulunan şeyleriñ hey’et-i hâzıralarına halel gelmesi emrinde takayyüdât ve i‘tinâya devâm olunması bi’l-cümle vilâyâta bâ-emirnâme-i sâmî emir ve iş‘âr buyurulmuşdur.

Fî 3 Receb sene 1291

( Kitâb tab‘ı hakkında olan nizâmnâmeye tezyîl olunan fıkarât )
( Nizâmiyedir ) [*]

Birinci Mâdde: Mü’ellifi ve yâhud sâhib-i imtiyâzı ve yâ bunlarıñ veresesî ber-hayât olmayan büyük kitâbları tab‘ etdirmek isteyenlere dört sene müddetle imtiyâz verilecekdir.

İkinci Mâdde: Mazhar-ı imtiyâz olmak üzere kebîr ‘add olunacak kitâblar gerek bir cild olsun ve gerek müte‘addid cüz’ ve cildlere münkasım bulunsun ecza-yı mecmû‘asınıñ her sahîfesi otuz yedi satırdan aşagı olmamak üzere nihâyet sekiz yüz sahîfeyi hâvî olacak ve bu tertîbden noksân kitâb tab‘ı içün imtiyâz verilmeyecekdir.

Üçüncü Mâdde: Harîta ve atlasları ve sâir tasâvîr-i musanna‘ayı şâmil...

[*] Nizâmnâme ikinci cildiñ 229 ncı sahîfesinde mündericdir.