433

İkinci madde mecalis-i tedrisiye biri reis ve kusûru aza olmak üzere yedi ve şubeleri dahi biri muhasib ve diğeri sandık emini olmak üzere üç neferden ibaret olacaktır.

( Mecalis-i tedrisiye ve şubelerinin suret-i teşekkülü )

Üçüncü madde her dairenin havi olduğu mahallat imam ve muhtar evvelleri ile ahali-i mahallat muteberanından münasib zevat dairenin merkezine tecemmü edip meclis-i tedris ve aña merbut şubeler içün hadd-i muayyenin iki misline müsavi olmak üzere kendi mahallelerinde gerek sıfat-ı resmiyeyi haiz olsun ve gerek olmasun müsavat eñ haysiyetlü hamiyetkaran ahaliden azalığa münasib görecekleri zevatı bi'l-intihab isim ve şöhretlerini mübeyyin bir kıt'a defterini tanzim ile Maarif Nezaret-i Celilesine takdim edeceklerdir.

Dördüncü madde işbu defterlerde muharrer zevattan meclis-i tedris ve aña merbut şubelerin reis ve azasının nezaretçe tefrik ve tayin olunduktan soñra meclis-i tedris reis ve azasının suret-i tayinleri canib-i nezaretten kendilerine tebliğ olunacak ve şube heyetinin suret-i tayinleri dahi meclis-i tedris marifetiyle şube heyet-i müntehabesine bildirilecektir.

Beşinci madde meclis-i tedris ve şubelerin azası gayr-i muvazzaf olup nihayet iki sene ifa-yı hizmet ettikten soñra tebdil olunarak üçüncü ve dördüncü maddeler ahkâmınca yerlerine sairleri intihab ve tayin kılınacak ve müddet-i mezkure zarfında azaluk münhal olur ise yerine diğerinin intihab ve tayininden dahi maddeteyn-i mezkureteyn ahkâmına tevfik-i muamele olunacaktır meclis-i tedris ve şubeler azalığında bulunmuş olanların tekrar intihabı caizdir.

Altıncı madde la-akal kırk haneyi şamil olan her mahallede bir meclis-i tedris şubesi bulunacak ve hanesi bundan aşağı olupta mekteplerini idareye muktedir olamayan mahallat meclis-i tedris marifetiyle civarda olan mahallelere ilhak olunacaktır her mahallenin eimme ve muhtarânı meclis-i tedrisin rey ve tensibiyle şubenin azalığında bulunacaktır.