447

( Hatime )

Mahlulât-ı mezkûrenin suret-i icârı muamelatında ba’d-ezîn ba’zı gûne müşkülât zuhur eder ise hall ve teshili zımnında işbu nizamnamenin bi’l-istizân ta’dil ve tashihi caiz olacakdır.

İrade-i seniye tarihi fi 19 Zilhicce sene 288 ve fi 16 Şubat sene 287

( Emlak-ı sırfa içün Defterhane’den verilecek senedata dair )

Memalik-i Şahane’nin şehir ve kasabatında ve kura ve nevahisinde bulunan emlak-ı sırfa yani yeri ve üzerindeki ebniye ve eşcarı mülk olan hane ve dükkan ve bağ ve bağçe ve akarat-ı saire ile mukataalı arazî-i mevkûfe ve bedel-i öşre merbut arazî-i miriye üzerlerinde bulunan emlak yani ebniye ve kürûm ve eşcar ashabına suret-i muntazamada senedler itasına dair nizamname layihasıdır.

Mukaddime

Birinci Madde: Şehir ve kasabatında ve kura ve nevahide bulunan bi’l-umum emlake, balası tuğralı matbu senedat-ı cedide ita kılınacak ve bundan böyle senedsiz emlak tasarrufu memnu olacakdır.

İkinci Madde: Senedat-ı cedide iki nev’ olup biri emlak-ı sırfaya ve diğeri zemini mukataalı olup üzerindeki ebniye veyahud eşcarı mülk olan mahallere mahsusdur.

Üçüncü Madde: Emlak muamelatını icra ve tesviye Defter-i Hakani memurlarına muhavveldir. Her sancakda Defter-i Hakani memuru maiyetinde emlak işleri içün bir katib mahsus bulunacağı gibi her kazada dahi memur-ı mumaileyhin vekili makamında ve tapu katibi refakatinde emlak katibi unvaniyle bir katib bulunacak ve bunların iktizasına göre refikleri dahi olacakdır.

Dördüncü Madde: Emlak muamelat-ı kaydiyesine merkez olmak üzere Defterhane’de bir kalem-i mahsus olacakdır.