484

Yirmi üçüncü madde — Memalik-i Devlet-i Aliye'ye ecnebi barutu idhali ve dahil-i memalikde afrad marifetiyle barut imali hususunun men'iyle ashab-ı ihtiyac içün Baruthane-i Âmire mamulatından olmak üzere mirî canibinden füruht idilecek baruta ve teferruatına dair fî gurre-i Şaban sene 287 tarihinde neşr olunan nizamname ile 27 Safer sene 88 tarihinde zeyl olunan mevadd-ı nizamiye ahkamı işbu nizamname-i cedidin neşri tarihinden itibaren külliyen mefsuhdur.

Yirmi dördüncü madde — Tebeddül-i muamelat ve icraat sebebiyle işbu nizamnamede mestur olmayan mevadd zuhura gelür ise zeyl ve ilavesi caiz olacakdır.
Fî 8 Muharrem sene 293 ve fî 23 Kânun-ı Sânî sene 291

( Dersaadet Tahvilat Borsasının Nizamnamesidir )
( Mukaddime )

Borsa doğrudan doğruya Maliye Nezaret-i Celilesinin taht-ı nezaretinde olub makarr-ı nezaret müşarileyha ile borsa komitesi canibinden müttefikan tayin olunacakdır.

Borsanın umur-ı zabıtası Hükümet-i Seniye memurları marifetiyle idare olunur.

Nezaret-i müşarileyha ile mezkûr komite beyninde vasıta olmak üzere canib-i Saltanat-ı Seniye'den bir komiser tayin buyurulup Hükümet-i Seniye'den borsa'ya ve borsa'dan dahi canib-i Hükümet-i Seniye'ye vuku bulacak tebligatın icrasına hâssa memurdur.

Nizamnamenin tamam-ı cereyan-ı ahkamına müteyakkızane dikkat itmek üzere komitenin müzakeratında komiser hazır bulunur ve meclisçe virilecek kararın mevki-i icraya vaz'ında mübaşeret eder.

Komite azasının intihabatı komiserin nezareti tahtında vuku bulur esham ve tahvilat üzerine olunacak muamelatın temin-i cereyanı maksadına mebni tanzim olunan işbu nizamnameye ittiba etmeklikle borsa azasının kâffesi mecburdur.

(İşbu)