485

İşbu nizamnamenin esham ve tahvilat bey’ ve şirasına aid olan ahkâmı borsa azasından olan bir mübayaacı vasıtasıyla icra-yı muamelat edenlerin cümlesine dahi şamildir.

* Birinci Fasıl *
( Borsa azasıyla bunların hademesi )

Birinci Madde Borsa azasının adedi namahduddur ve sinni yirmi bire vasıl olmayan kimse azalığa dahil olamaz.

İkinci Madde Borsa azası üç sınıfa munkasımdır birincisi mübayaacılar ikincisi simsarlar üçüncüsü dahi çakon yahud jobar tabir olunanlardır.

Üçüncü Madde Borsa azalığına dahil olmak isteyen işbu üç sınıf hangisine girmek muradında olduğunu mübeyyin zîrde on birinci madde mucibince teşkil olunan komiteye bir istida vermek lazım gelir.

İşbu istidanın komite canibinden ita olunacak varaka-i mahsusa üzerine tanzim olunması ve borsa azasından iki kişi tarafından tasdik edilmesi şarttır.

Atik borsa azası işbu nizamname ahkâmına tebaiyet edeceklerini müşir bir kıta sened imza ve ita eyledikleri halde yeni borsaya bi’l-istihkak aza olur.

Dördüncü Madde Borsaya dahil olmak isteyenlerin istidalarını tetkik etmek üzere komite on beş günde bir kere likidasyon yani kat-ı hesab gününü taakub eden pazar ertesi günü tecemmu edecek ve mezkûr istidalar hakkında ekseriyet-i ârâ ile ittihaz-ı karar eyleyecektir.

Beşinci Madde Borsa azasının her biri zîrde muharrerü’l-mikdar resm-i senevî ile mükelleftir.

Şöyle ki isimleri defter-i mahsusa kayd olunmak lazım gelen iki nefer havale memurlarının duhuliyesi dahil-i hesab olmak üzere mübayaacılar beş aded lira-yı Osmanî ve simsarlar ikişer aded lira-yı Osmanî ve kezalik defter-i mahsusa ismi kayd olunacak olan bir nefer adamıyla beraber çakonlarına ikişer aded lira-yı Osmanî ve bunların fazladan olarak diğer bir nefer adamı dahi bir aded lira-yı Osmanî ita eyleyeceklerdir.