491

Muvafakatiyle kat’iyyen mu‘teber olabilur havale eden zat ancak o vakit mes’uliyetden kurtulabilur.

Havaleyi kabul eden zat havale olunan zata yarım saat zarfında tebliğ-i madde etmez ise havale eden zata müracaat etmek hakkını zayi‘ eder.

Bir havaleye mahsuben kabul olunan ale’l-hesab havale edeni mes’uliyetden kat’iyyen kurtarır.

Yirmi dokuzuncu madde: Muamelat-ı ruzmerrede depozitodan başka esham-ı umumiye fiyatınca yirmi para ve sair esham ve tahvilat fiyatınca dahi yüzde beş fark hasıl olur ise bu farkdan müstefid olan tarafın anı diğer tarafdan taleb etmeğe hakkı olur meğerki o farkdan mutazarrır olan taraf yirmi sekizinci maddede beyan olunduğu üzere taahhüdünü ahara nakl ve havale ede.

Balada muharrer ahkamın adem-i icrası takdirinde esas-ı muamele olan esham ve tahvilat bi’l-muzayede bey‘ veyahud fürûht olunarak taahhüdünde durmayan tarafın taahhüdü ibka olunur.

Otuzuncu madde: Karşılaştırılmış olan muamelatın farkı günü gününe tesviye olunmak lazım gelir.

Eğer mezkur fark tesviye olunmaz ise müddei tarafından vuku‘bulacak şikayet üzerine komite katibi medyunun ertesi gün borsanın küşadından evvel ifa-yı deyn etmediği halde borsaya duhulden men‘ olunacağını ve te’diye-i deynden aciz olanlara mahsus olarak tanzim ve ta‘lik olunan cedvele ismi derc ve ilan edileceğini beyan ve ihtar eder.

Otuz birinci madde: Primli olan yani (stellaj) ve (aşağı dubla) ve (yukarı dubla) ta‘bir olunan muamelatın kaffesinde primi alan kimse verenin ilk talebi üzerine balada yirmi beşinci ve yirmi yedinci ve yirmi dokuzuncu maddelerin ahkamına tevfikan depozito vaz‘ıyla anı te’min eylemeğe mecburdur.

Otuz ikinci madde: Primli veyahud vadeli işlerin vadesi pazar veyahud yortu gününe tesadüf eylediği halde ertesi gününe kalır ve vadeli muamelat hakkında aylar yevm-i muamelatın ertesi gününden i‘tibaren otuzar gün i‘tibar olunur.