497

Onuncu Fasıl

( Tadilat )

Elli Altıncı Madde — İşbu nizamnamenin tadili borsa azasının nısfından ziyadesi tarafından tahrîren istid'a olunmadıkça komite tarafından kabul olunamaz. Usul-i meşruhaya muvafık suretde vuku bulan tadilat istid'ası komite tarafından hükümet komiserine tebliğ olunacak ve komiser dahi anı derhal saltanat-ı seniyyenin mevki-i kabul ve tasdik-i âlîsine arz etmek lazım gelecektir. Ve bir de taraf-ı devlet-i aliyeden ba'zı tadilat teklif olunduğu halde derhal komite müzakeresine mübaşeret edecektir.
İşbu tadilat istid'a ve teklifleri beher sene yalnız kânun-ı sani ve temmuz ibtidalarında vuku bulur.

Elli Yedinci Madde — İcabına göre tadilat icra olundukça komite işbu tadilatın derciyle nizamnameyi yeniden tab ettirerek neşr ve ilan edecektir.

Elli Sekizinci Madde — Saltanat-ı seniye masarifi kendisine aid olmak üzere her gün İngiltere ve Fransa fondolariyle devlet-i aliyenin esham-ı umumiye ve istikrazat-ı hariciyesinin Londra'ca ve Paris'çe fiyatlarını ve kezalik Londra'da ve Paris'de cari olan iskontonun fiyat-ı resmiyesini mübeyyin telgrafname celb ettirecektir.
Havadis-i kâzibe neşrine meydan vermemek içün mezkûr telgrafname mümkün olduğu halde borsanın küşadından evvel talik olunacaktır.

Fi 11 Şevval sene 1290 ve fi 19 Teşrin-i Sani sene 1289