503

mahlûleye müteaddid tâlibler zuhûr eyledikde ol cihet bunların ek ziyâde ehliyetlüsine tevcîh olunur ve şâyed tâlibler ehliyetde müsâvî olurlar ise birinci derecede müteveffâya karâbeti olan ve ikinci derecede uhdesinde dîger cihet bulunmayan ve üçüncü derecede fakr hâli bulunan tercîh kılınur ve dördüncü derecede kur'a medâr-ı tercîh ittihâz idilür.

On İkinci Madde
Bir cihet-i müstakille müceddeden ve yâhud mutasarrıfının vefâtiyle mahlûlünden fîmâba'd hisselere taksîm ile eşhâs-ı müteaddideye tevcîh olunmayacakdır.

On Üçüncü Madde
Şimdiye kadar hisas-ı müteaddideye münkısim olarak tevcîh olunmuş olan cihetlerden bir cihetin nısf ve sülüs ve rub' gibi bir hissesine mutasarrıf olan kimse vefât eyledikde hisse-i mahlûle mevâdd-ı sâbıka ahkâmına tatbîkan müteveffânın evlâdına tevcîh olunur ve müteveffânın evlâdı yoğise ve yâhud yalnız evlâd-ı kibârı olub da nâ-ehil bulunurlar ise ol hisse hisas-ı sâire ashâbından ek ziyâde ehliyet ve iktidârı olan kimseye ve şâyed ashâb-ı hisas ehliyetden müsâvî bulunurlar ise kur'a ile içinden birine ve yâhud hisselerine ilhâkan cümlesine tevcîh olunur ve eğer hissedârlarda aslâ ehliyet ve iktidâr bulunmaz ise hissedârların uhdelerinde bulunan hisseler ref' ile gerek hisse-i mahlûle ve gerek ref' olunan hisas-ı sâire birleşdirilerek topdan ve ehil ve erbâbına tevcîh kılınur ve şâyed işbu hisselerin vâridâtı derece-i kifâyede olub da başka başka tevcîhinde menfa'at tahakkuk eder ise ol hâlde hisas-ı mezkûr ayrı ayrı dahi ehil ve erbâbına tevcîh olunabilir.

On Dördüncü Madde
Bu cihetin bir hissesine mutasarrıf olan kimse uhdesinde bulunan hisseyi yalnız ehil ve erbâb olan müşterikine kasr-ı yed idebilüb hâricden kimseye kasr-ı yed edemeyecekdir ve şâyed ki müşteriklerinde ehil ve erbâbı bulunmaz ise hâricden ehil ve erbâbına kasr-ı yed edilebilecekdir.

On Beşinci Madde
Her nevi' cihâtın gerek evlâda ve gerek hâricden ehil ve erbâbına icrâ-yı tevcîhâtda bunden böyle uhdesine tevcîh-i cihet olunacakların...