51

Satmışsın ben ise şu cihetle anın şefîiyim ve taleb-i şuf'a etmişdim şimdi
dahi taleb ederim şâhid olunuz demelidir.
Ve eğer şefî' uzak mahalde bulunup da bizzat bu vechile taleb-i takrîr ve işhâd
edemezse birini tevkîl eder.
Vekîl bulamaz ise mektûb gönderir.

1031 Madde Taleb-i takrîr ve işhâddan sonra şefî'in huzûr-ı hâkimde taleb
ve da'vâ etmesi lâzımdır.
İşte buna taleb-i husûmet ve temellük denilir.

1032 Madde Şefî' eğer taleb-i muvâsebeyi te'hîr eder ise meselâ akd-i bey'i
duyduğu gibi ol meclisde taleb-i şuf'a etmeyip de başka iş ile yâhud âhar
sadede dâir bir bahs ile meşgûl olmak gibi i'râza delâlet eder bir hâlde
bulunur ise yâhud taleb-i şuf'a etmedin ol meclisden kalkar ise hak-kı
şuf'ası sâkıt olur.

1033 Madde Şefî' eğer taleb-i takrîr ve işhâdı velev ki mektûb ile olsun
icrâ edecek kadar vakit geçip de te'hîr ederse hak-kı şuf'ası sâkıt olur.

1034 Madde Taleb-i takrîr ve işhâddan sonra şefî' eğer âhar diyârda
bulunmak gibi bir uzr-i şer'îsi yok iken taleb-i husûmeti bir ay te'hîr ederse
hak-kı şuf'ası sâkıt olur.

1035 Madde Mahcûrun hak-kı şuf'asını velîsi taleb eder.
Ve bir sagîrin hak-kı şuf'asını velîsi taleb etmez ise ba'de'l-bulûğ kendinin taleb
şuf'aya salâhiyeti kalmaz.

Fasl-ı Râbi'

( Hükm-i Şuf'a Beyânında )

1036 Madde Müşterinin bi't-terâzî teslîmiyle yâhud hâkimin hükmüyle şefî'
olan kimse meşfû'a mâlik olur.

1037 Madde Bir mülkü şuf'a ile almak ibtidâ-i iştirâ menzilesindedir.
Binâenaleyh hıyâr-ı rü'yet ve hıyâr-ı ayb ile red gibi ibtidâ-i iştirâ ile sâbit olan
hükümler şuf'a ile dahi sâbit olur.