515

Yirmi üçüncü madde: Mukavelename kayd ve temhir olunduktan sonra kanun ve nizama mugayir olduğu tebeyyün edip de fesih olunması lazım gelir ise kontrato idaresi ondan dolayı mesul olmayacaktır.

Yirmi dördüncü madde: Kirada olan bir akar menafi-i umumiye için nizam-ı mahsusu mucibince canib-i hükümetten iştira olunduğu halde tayin olunan müddet zarfında müstecir ol akarı terk etmeğe mecbur olacaktır.

Yirmi beşinci madde: Resmen tasdik olunmuş olan kontratolar ahkamının icrası muhattem olup böyle bir kontratoyu akidinden biri hükmünün icrası için kontrato idaresine ibraz eyledikde müddei aleyhe kırk sekiz saat zarfında ahkam-ı mündericesine ittiba etmesi tenbih ve icra etmediği halde işbu müddet-i muayyenin mürurunu müteakib zabıtaca icbar olunacaktır. Müddei aleyhin kontrato hükmünün icrasına her ne suretle olur ise olsun taallül ve muhalefeti kabul olunmayacaktır. Ancak bedel-i icarı suret-i saire ile tesviye ettiğini havi muteber sened ibraz eder ise hükm-i mukaveleyi icra edeceğine kontrato idaresince kefili alınarak işin ciheti fasl ve hükm olunmak üzere aid olduğu mahkemeye gönderilecektir. Tasdik-i resmi tahtında bulunmayan kontratoların icra-yı ahkamı için ehad-ı tarafeynin kontrato idaresine müracaati vukuunda mutad olan resmin iki katı istifa olunduktan sonra şurut-ı mukavelenin icra olunmamasından dolayı akideyn beyninde tahaddüs eden davanın faslı için kezalik aid olduğu mahkemeye irsal olunacaktır.

Yirmi altıncı madde: Tarafından biri mukavelenamede münderic olan şeraitin haricinde bir şart dava ederse istima olunmayacaktır.

Yirmi yedinci madde: Tarafından birisinin yahud ikisinin dahi vefatı vukuunda varisleri onların makamına kaim olup rızalarıyla mukavelenameyi fesih yahud ibka edebilirler. Amma yalnız tarafından biri vefat vukuuyla icarenin infisahını dava eder ise istima olunmaz.